इंडिया दर्पण ऑनलाईन डेस्क
मुलुंडमध्ये एका मराठी महिलेला घर नाकारण्यात आल्यामुळे राज्यभर त्यावरुन संतप्त प्रतिक्रिया उमटल्या. राजकीय पक्षांनी या घटनेचा निषेध केला. तर मनसेने दम भरल्यानंतर बिल्डिंगच्या सचिवाने माफी मागितली. याच घटनेवर मनसे अध्यक्ष राज ठाकरे यांनीही ट्विट करून प्रतिक्रिया दिली आहे. राज ठाकरे यांनी मुंबईसह महाराष्ट्रात पुन्हा असले प्रकार खपवून घेतले जाणार नसल्याचा सज्जड दमच दिला आहे.
राज ठाकरे यांनी केलेल्या ट्विटमध्ये म्हटले आहे, मुंबईत, मुलुंडमध्ये एका मराठी स्त्रीला, ती मराठी आहे म्हणून व्यवसायासाठी जागा नाकारल्याची घटना समोर आली. इतरांनी निषेध वैगरे व्यक्त केला. आम्हाला निषेध नोंदवणं इत्यादी प्रकार माहित नाहीत. त्यामुळे माझ्या महाराष्ट्र सैनिकांनी आमच्या पद्धतीने दम दिल्यावर त्या बिल्डिंगच्या सचिवाने माफीनामा दिला.
हे असले प्रकार खपवून घेतले जाणार नाहीत. मुंबईत, महाराष्ट्रात जर पुन्हा हे असं काही घडलं तर गालावर वळ उठतील हे निश्चित. आणि सरकारने पण जरा आपला धाक दाखवला पाहिजे. काल मुलुंडमध्ये माझ्या महाराष्ट्र सैनिकांनी जाऊन जी समज दिली त्यांचं मनापासून अभिनंदन. तुमचं कायम लक्ष असतंच आणि मराठी माणसावर कुठेही अन्याय झालं तर त्याला महाराष्ट्र नवनिर्माण सेनाच आठवते. हे असंच सुरु राहिलं पाहिजे. अन्याय दिसेल तिथे तुमची लाथ बसलीच पाहिजे ! असेही त्यांनी ट्विटमध्ये म्हटले आहे
