इंडिया दर्पण ऑनलाईन डेस्क
जालनाः ‘एक्झिट पोल’वर मी राजकारणात नसल्याने कसा बोलणार, असा प्रतिप्रश्न मराठा संघर्षयोद्धा मनोज जरांगे पाटील यांनी केला. मी नाव घेऊन कोणाला पाडा म्हटले नाही. मी मराठ्यांना तुमच्या मताची किंमत केली पाहिजे, भीती वाटली पाहिजे, असे मी म्हटले होते. राज्यात महायुतीच्या जागा कमी होणार असतील, तर ती त्यांच्या कर्माची फळे आहेत. नियतीला सहन होत नाही, हा निसर्गाचाच नियम आहे, असा टोला त्यांनी लगावला.
जरांगे पाटील म्हणाले की, मी पंतप्रधानांवर टीका केली नाही. त्यांचेच काही नेते मराठा समाजाचा द्वेष करतात. तिसऱ्यांदा सत्ता येण्याची चिन्हे दिसू लागताच भीती दाखवत आहेत का? लोकसभा निवडणुकीत मोदी यांना इथेच राहण्याची वेळ भाजपच्या चार दोन लोकांमुळे आली. जे सत्य आहे, ते मी सांगितले. राज्यात सर्वच जातींचे हाल आहेत. यापुढे सर्वंच जातीचा स्वाभिमान जागा होणार आहे. यांनी काही जातीचे नेते आणि काही जाती संपवल्या आहेत. त्यांचे काही नेते द्वेष करतात. काड्या करणे, आंदोलन फोडणे, खोट्या केसेस करणे, हल्ले करणे आदीतून सत्तेचा पदाचा दुरुपयोग करतात.
आंदोलन मोडण्यासाठी सरकारकडून खोड्या सुरू असल्याचा आरोप करून ते म्हणाले, की सर्व जातींना यांनी फसवलं आहे. धनगर, बंजारा, लिंगायत सर्वांची परिस्थिती सारखीच आहे. अन्यायाला वाचा फोडायला जनतेला लोकशाहीत मतदानरूपी हत्यार हातात घ्यावे लागले. गोड बोलून सत्ता घ्यायची आणि जनतेवर पुन्हा अन्याय करायचा. आम्हाला कोणाच्या गुलालाचा आनंद नाही. कोणी निवडून आला काय आणि कोणी पडला काय? आम्हाला फक्त आरक्षणाच्या गुलालात आनंद आहे. मी आंदोलनावर ठाम आहे.
गाव पातळीवर एकही ओबीसी बांधव मराठ्यांच्या आरक्षणाविरोधात नाही. मुख्यमंत्री आणि उपमुख्यमंत्र्यांनी आंदोलन मोडण्यासाठी खोड्या न करता गोडी गुलाब्याने आंदोलन हाताळावे. सग्यासोयऱ्याची अंमलबजावणी करावी. नाहीतर २८८ विधानसभा मतदारसंघात आम्ही वेगवेगळ्या जाती धर्माचे उमेदवार उभे करू, असा इशारा त्यांनी दिला.
