नाशिक (इंडिया दर्पण वृत्तसेवा)- चेहडी पंपीग भागात दरोडा टाकण्याच्या उद्देशाने दबा धरून बसलेल्या तीन चोरट्यांना पोलीसांनी गजाआड केले. या चोरांपैकी दोन साथीदार पोलीसांची चाहूल लागताच पसार झाले आहेत. याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
शंकर शामराव कापसे (३४ रा.अंबरनाथ), विकास सुधाकर पटेकर (३० रा.संत कबिरनगर,गंगापूररोड) व अफझल हुसेन सय्यद (२९ रा. भगूर ता.जि.नाशिक) अशी अटक करण्यात आलेल्या संशयित चोरट्यांची नावे असून कापसे याच्या विरूध्द नाशिकरोड पोलीस ठाण्यात लुटमारीसह गंभीर गुन्हे दाखल आहेत.
बुधवारी (दि.२९) रात्री नाशिकरोड पोलीसांचे गस्ती पथक चेहडी पंपीग भागात गस्त घालत असतांना संशयित हॉटेल लाला का ढाबा पाठीमागील मातेश्वरी अंगण कन्स्ट्रक्शन भागात संशयास्पद मिळून आले. पोलीसांची चाहूल लागताच त्यांचे दोन साथीदार अंधाराचा फायदा घेवून पसार झाले असून संशयितांच्या अंगझडतीत लोखंडी कटावणी,दोरी,मिरची पावड, स्क्रू ड्रायव्हर अश्या वस्तू मिळून आल्या आहेत. याबाबत हवालदार विष्णू गोसावी यांनी दिलेल्या फिर्यादीवरून गुह्याची नोंद करण्यात आली असून अधिक तपास सहाय्यक निरीक्षक सुर्यवंशी करीत आहेत.
