इंडिया दर्पण ऑनलाईन डेस्क
पालघर : पालघर रेल्वे स्थानकावर मालगाडी घसरल्याने पहाटेपासूनच डहाणू ते विरार लोकलसेवा ठप्प आहे. त्यामुळे या भागातून मुंबईकडे कामासाठी जाणाऱ्या चाकरमान्यांचे कमालीचे हाल होत आहेत. गाड्या बंद असल्यामुळे प्लॅटफॉर्मवर प्रचंड गर्दी आहे.
पश्चिम रेल्वेच्या पालघर स्टेशनजवळ काल संध्याकाळी साडे पाच वाजण्याच्या दरम्यान गुजरातहून मुंबईकडे जाणाऱ्या मालगाडीचे डबे घसरले त्यामुळे ट्रॅक नंबर दोन, तीन आणि चार हे नादुरुस्त झाले. त्यामुळे अप आणि डाऊनची दोन्हीही रेल्वे सेवा ठप्प झाली आहे. आजही उपनगरीय सेवा बंद असून लोकल रद्द करण्यात आल्या आहेत. लांब पल्ल्याच्या ट्रेन विलंबाने धावणार आहेत.
सध्या दुरुस्तीचे काम प्रगतीपथावर असून अजूनही पाच ते सहा तास काम पूर्ण व्हायला लागतील, अशी माहिती रेल्वेने दिली. दरम्यान, छत्रपती शिवाजी महाराज टर्मिनस येथे २४ डब्यांच्या गाड्यांसाठी प्लॅटफॉर्म दहा आणि ११चा विस्तार करण्याचे काम सुरू असल्याने मेगाब्लॉक घेण्यात येणार आहे. त्यामुळे परिणामी सुमारे सहाशे लोकल फेऱ्या रद्द होण्याची शक्यता आहे.
