नाशिक (इंडिया दर्पण वृत्तसेवा)- ग्राम विकास विभागाच्या मान्यतेनुसार २ नोव्हेंबर २०२३ रोजी घेण्यात आलेल्या प्रयोगशाळा तंत्रज्ञ व २१ व २६ डिसेंबर २०२३ रोजी घेण्यात आलेल्या औषध निर्माण अधिकारी या पदाच्या परीक्षेचा निकाल आयबीपीएसकडून प्राप्त झाल्यानंतर बुधवार २१.०५.२०२४ रोजी मुख्य कार्यकारी अधिकारी श्रीमती आशिमा मित्तल यांच्या मान्यतेने जाहीर करण्यात आला असून तो नाशिक जिल्हा परिषदेच्या https://zpnashik.maharashtra.gov.in या संकेतस्थळावर प्रसिद्ध करण्यात आला आहे.
औषध निर्माण अधिकारी या पदाच्या २० जागांकरिता २१ व २६ डिसेंबर २०२३ रोजी ऑनलाईन परीक्षा आयोजित करण्यात आली होती. सदर परीक्षेला एकूण ५०५७ परीक्षार्थीनी ऑनलाईन अर्ज सादर केले होते व त्यापैकी ३०९० परीक्षार्थी परीक्षेला उपस्थित होते. तर प्रयोगशाळा तंत्रज्ञ या पदासाठी या पदाच्या १४ जागांसाठी २६०७ ऑनलाइन अर्ज सादर केले होते यापैकी १३३४ विद्यार्थी परीक्षार्थी परीक्षेसाठी उपस्थित होते.
जिल्हाधिकारी जलज शर्मा व मुख्य कार्यकारी अधिकारी आशिमा मित्तल यांच्या मार्गदर्शन व नियंत्रणाखाली, तसेच जिल्हा परिषदेच्या परीक्षेकरिता “नोडल अधिकारी” तथा उप मुख्य कार्यकारी अधिकारी (सामान्य प्रशासन) रवींद्र परदेशी व जिल्हा परिषदेचे विभाग प्रमुख यांच्या उपस्थितीत आयबीपीएस या संस्थेकडून ऑनलाईन परीक्षा घेण्यात आल्यात. यासाठी तसेच भरारी पथक प्रमुख अतिरिक्त मुख्य कार्यकारी अर्जुन गुंडे व प्रकल्प संचालक प्रतिभा संगमनेरे, प्रत्येक परीक्षा केंद्राकरिता “व्हेन्यु ऑफिसर” व सहाय्यक अधिकारी यांची नियुक्त्या करण्यात आल्या होत्या. यातून प्रारुप निवडयादी व प्रारुप प्रतिक्षायादी तयार करुन मुख्य कार्यकारी अधिकारी यांच्यामार्फत जिल्हाधिकारी यांना सादर करण्यात येईल व त्यांच्या मान्यतेने सदर यादीतील उमेदवार यांच्या मुळ कागदपत्रांची पडताळणी करण्यात येणार आहे, अशी माहिती उप मुख्य कार्यकारी अधिकारी रवींद्र परदेशी यांनी दिली.
