इंडिया दर्पण ऑनलाईन डेस्क
महायुतीमधील धाराशीव व नाशिकच्या जागेचा तिढा सुटला असून त्याची आजच घोषणा होण्याची शक्यता आहे. या दोन्ही जागा राष्ट्रवादी अजित पवार गट लढवणार असल्याचे निश्चित झाले आहे. नाशिकमधून छगन भुजबळ तर धारशीवमध्ये विधान परिषदेचे आमदार विक्रम काळे यांची उमेदवारी निश्चित झाल्याचे बोलले जात आहे.
या दोन्ही जागांवर महायुतीमधील तीन्ही पक्षांनी दावा केला होता. पण, त्यात राष्ट्रवादीच्या अजित पवारांना या जागा राखण्यात यश मिळाले असल्याचे बोलले जात आहे. नाशिकच्या जागेवर विद्यमान खासदार हेमंत गोडसे यांनी काल प्रचाराला सुरवात केली होती. त्यानंतर उमेदवारी जाहीर झालेली नसतांना प्रचार कसा सुरु केला असा प्रश्न विरोधकांकडून विचारला जात होता. तर दुसरीकडे भाजप मंत्री गिरीश महाजन, राधाकृष्ण पाटील यांनी नाशिकची जागा भाजपला मिळावी असा आग्रह धरला होता. तर छगन भुजबळ यांनी आजच ज्यांना उमेदवारी मिळेल त्यांचे काम करु असे सांगितले होते. पण, त्यानंतर ही बातमी समोर आली आहे.
धाराशीवमध्ये महायुतीतर्फे आयएएस अधिकारी प्रवीणसिंह परदेशी यांचे नाव चर्चेत होते. पण, त्यांनी राष्ट्रवादीकडून लढणार नसल्याचे सांगून भाजपकडूनच उमेदवारी करणार केल्याचे सांगितले. त्यानंतर राष्ट्रवादी अजित पवार गटाने विक्रम काळे यांचे नाव निश्चित केल्याचे बोलले जात आहे. आज सकाळीच आ. काळे यांनी अजित पवार यांची भेट घेतली. त्यानंतर या चर्चेला उधाण आले.
