इंडिया दर्पण ऑनलाईन डेस्क
अकोला जिल्ह्यातील बाळापूर येथ अज्ञात वाहनाच्या धडकेत कारमधील डॉक्टर पुत्रासह आईचा जागीच मृत्यू झाल्याची घटना घडली. खामगाव ते बाळापूर मार्गावरील हॉटेल सुदर्शन ढाब्याजवळ रविवारी रात्री हा अपघात झाला. या अपघातात डॉ. निलेश माळोदे व त्याची आई सौ. संगीता माळोदे यांचा जागीच मृत्यू झाला. तर निलेशचे वडील रामराव माळोदे हे गंभीर जखमी झाले. त्यांना नागरिकांनी तातडीने खामगाव येथील खासगी रुग्णालयात उपचारासाठी दाखल केले आहे.
डॉ. निलेश माळोदे याचा विवाह इंदूर येथील एका मुलीशी ठरला होता. नववधूला होळीचा सण देण्याकरिता रामराव लक्ष्मण माळोदे, डॉ. निलेश माळोदे आणि सौ. संगीता रामराव माळोदे हे तिघे जण कारने इंदूर येथे गेले होते. ते परत बाळापूरला येत असतांना हा अपघात झाला.
असा झाला अपघात
मृत डॅाक्टर निलेश माळोदे हे दंत शल्य चिकित्सक होते. बाळापूर येथे येत असताना गावाच्या जवळ पोहोचताच अकोलाकडून खामगावच्या दिशेने येणाऱ्या अज्ञात वाहनाने त्यांच्या गाडीला समोरून धडक दिली. या धडकेत कार तीन ते चार वेळा पलटी खाऊन रस्त्याच्या कडेला जाऊन कोसळली. त्यात डॉ. निलेश माळोदे व त्याची आई सौ. संगीता माळोदे यांचा जागीच मृत्यू झाला.
