इंडिया दर्पण ऑनलाईन डेस्क
छत्रपती संभाजीनगर: शेंदूरवादा- सावखेडा महामार्गावर बहिणीच्या प्रेम विवाहाला मदत केल्याच्या रागातून चिडलेल्या भावाने २४ वर्षाच्या तरुणाच्या डोक्यावरून तब्बल चार वेळा बोलेरो कार घातली. त्यात त्याचा जागेवरच मृत्यू झाला. संभाजीनगरातील घडलेल्या या घटनेमुळे सर्वत्र संताप व्यक्त केला जात आहे. पवन शिवराम लोढे असे मृत तरुणाचे नाव आहे.
मृत पवनचे पुढील आठवड्यात लग्न होते त्यातच ही दुर्दैवी घटना घडली. विवाह असल्याने पवन वडिलांसोबत बँकेतून पैसे आणायला गेला होता. या वेळी त्याच्या दुचाकीला बोलेरोच्या मदतीने जोरदार धडक देण्यात आली. तरुण खाली पडल्यानंतर त्याच्या अंगावर चार वेळा बोलेरो कार घालून त्याचा चेंदामेंदा करण्यात आला. पवनच्या वडिलांसमोर हा प्रकार घडल्याने त्यांना मानसिक धक्का बसला.
हे होते संतापाचे कारण
पवनच्या मामाचा मुलगा विशाल लक्ष्मण नवले याने संशयित आरोपी सचिन वाघचौरे, विशाल वाघचौरे यांच्या बहिणीशी पळून जावून विवाह केला. त्यांच्या विवाहाला पवन याने मदत केली होती. याचाच राग मनात धरून हे भयानक कृत्य संशयिताने केले.
