इंडिया दर्पण ऑनलाईन डेस्क
राज ठाकरे महायुतीमध्ये गेल्याने काही फरक पडत नाही. महाराष्ट्र, मुंबईतील जनता सूज्ञ आहे. महाराष्ट्रावर चाल करुन येणा-या महारष्ट्रावर घाव घालणा-या अनेक शाह्यांचा जनतेने समाचार घेतलाय. महाराष्ट्रावर घाव घालणा-या अशी शक्तींना कोणी मदत करत असेल तर महाराष्ट्रातील जनता ते सहन करणार नाही असे वक्तव्य ठाकरे गटाचे खासदार संजय राऊत यांनी केले. त्यानंतर मनसेचे प्रवक्ते व सचिव योगेश खैरे यांनी सोशल मीडियावर मोठी पोस्ट करत त्याला उत्तर दिले आहे.
या पोस्टमध्ये म्हटले आहे, संजय राऊत, विश्वप्रवक्ते सध्या अचानक आपल्याला जुन्या काही गोष्टी आठवू लागल्याचे समजले. महाराष्ट्रातील जनतेला आपल्याही अनेक गोष्टी लक्षात आहेत हे ध्यानात असू द्या ! अनेक गोष्टी आहेत त्यातील काहींची आठवण करून देतो !!
- नरेंद्र मोदींच्या उंचीचा नेता देशात नाही आणि पुढील 25 वर्षे होऊ शकत नाही असं आपण स्वतः म्हणाला होतात.
- शिवसेना भाजपसोबत युतीत सडली असं 2017 ला आपले पक्षप्रमुख म्हणाले होते…. मग 2019 साली पुन्हा भाजपसोबत युती केली.
- तरीही पुन्हा सडू न देता जनतेने तुम्हाला एकत्र सत्ता दिली तरीही तो जनादेश अव्हेरून विचारधारेच्या विरुद्ध पक्षांसोबत फक्त मुख्यमंत्री पदासाठी युती केली.
- आपले पक्षप्रमुख आणि आपण शिवतीर्थावर ज्यांच्या सोबत बसले होते त्यांच्याबाबत किती टोकाचं आपण बोलला होतात…. आठवतंय का ?
- आपल्या पक्षाच्या मुखपत्रात मराठा मोर्चाचा उल्लेख मुका मोर्चा असा कुणी केला होता ?
- आणि आपली विचारधारा कधी काळी हिंदुत्ववादी होती…. आठवतंय का ?
आता ही पोस्ट चांगलीच चर्चेची ठरली आहे.
