नाशिक (इंडिया दर्पण वृत्तसेवा) – जन्मदात्या आईचा गळा घोटणा-या मुलास जिल्हा व सत्र न्यायालयाने जन्मठेपेची शिक्षा सुनावली. २०१८ मध्ये वडाळागावातील गणेशनगर भागात ही घटना घडली होती. कामधंदा करण्याचा तगादा लावणा-या आईचा मुलाने खून केला होता. याप्रकरणी इंदिरानगर पोलीस ठाण्यात खूनासह पुरावा नष्ट करण्याचा प्रयत्न केल्याप्रकरणी गुन्हा दाखल करण्यात आला होता.
अल्लाउद्दीन कमरुद्दीन शेख असे शिक्षा सुनावण्यात आलेल्या आरोपीचे नाव आहे. रुक्साना कमरुद्दीन शेख (६८, रा. गणेश नगर, वडाळागाव, इंदिरानगर) असे मयत महिलेचे नाव आहे. १४ नोव्हेंबर २०१८ रोजी दुपारी साडेचार ते सात वाजेच्या दरम्यान ही घटना घडली होती. आरोपी अल्लाउद्दीन हा काहीही कामधंदा करीत नसल्याने आई रुक्साना हिने त्यास कामधंदा करण्याचे सांगितले असता, त्याचा राग येऊन आरोपी अल्लाउद्दीन याने आई रुक्साना यांचे नाक-तोंड दाबून गळा आवळून जीवे ठार केले. त्यानंतर पुरावा नष्ट करण्याच्या हेतूने तोंड ओढणीने तर हातपाय दोरीने बांधून ब्लँकेटमध्ये मृतदेह गुंडाळला होता. याप्रकरणी इंदिरानगर पोलिस ठाण्यात गुन्हा दाखल करण्यात आला.
तत्कालीन सहायक निरीक्षक एन.एन. मोहिते यांनी तपास करीत दोषारोपपत्र न्यायालयात सादर केले. जिल्हा सत्र न्यायधीश श्रीमती आर. एन. शिंदे यांच्यासमोर खटल्याचे काम चालले. सरकार पक्षातर्फे सहायक अभियोक्त अपर्णा पाटील, सहायक अभियोक्ता रेवती कोतवाल यांनी कामकाज पाहत साक्षीदार तपासले. आरोपीविरोधातील पुरावे सिदध झाल्याने न्यायालयाने आरोपीला जन्मठेप व दोन हजारांचा दंड ठोठावला. पैरवी अधिकारी म्हणून हवालदार सुधाकर गावकवाड, रशिद शेख यांनी पाठपुरावा केला.
