नाशिक (इंडिया दर्पण वृत्तसेवा)- मित्राचा वाद मिटविणे एका तरूणास चांगलाच महागात पडला आहे. दुकलीने त्याच्यावर धारदार शस्त्राने हल्ला करीत जखमी केले असून याप्रकरणी पंचवटी पोलीस ठाण्यात गुन्हा दाखल करण्यात आला आहे.
गणेश चौधरी व अनिकेत डगळे अशी तरूणावर काही तरी धारदार शस्त्राने हल्ला करणा-या संशयितांची नावे आहेत. याबाबत मंगेश सुभाष शिंदे (२१ रा.नर्गिस दत्त शाळेजवळ, टकलेनगर) या जखमी युवकाच्या जबाबावरून हा गुन्हा दाखल झाला आहे. शिंदे गरूवारी (दि.१४) दुपारच्या सुमारास परिसरातील कृष्णनगर गार्डन परिसरात गेला असता ही घटना घडली.
गार्डन मध्ये दोघे संशयित शिंदे याच्या मित्रास शिवीगाळ व दमदाटी करीत होते त्यामुळे त्याने वाद मिटविण्यासाठी मध्यस्थी करण्याचा प्रयत्न केला असता संतप्त दोघांनी त्याच्यावर काही तरी धारदार वस्तूने सपासप वार केले. या घटनेत मंगेश शिंदे जखमी झाला असून त्याच्यावर उपचार सुरू आहेत. अधिक तपास हवालदार घुगे करीत आहेत.
गर्दीत पर्स मधून पाकीट चोरीला
नाशिक (इंडिया दर्पण वृत्तसेवा)- महिलेच्या गळयातील पर्स मधून चोरट्यांनी पैसे ठेवण्याचे पाकिट हातोहात लांबविल्याची घटना बागवानपुरा भागात घडली. या पाकिटात सोन्याचे कानातले,अंगठी आणि रोकड असा सुमारे ५३ हजार १०० रूपये किमतीचा ऐवज होता. याप्रकरणी भद्रकाली पोलीस ठाण्यात चोरीचा गुन्हा दाखल करण्यात आला आहे.
सलमा जराक शेख (रा.तपोवनरोड,बोधलेनगर) यांनी याबाबत फिर्याद दिली आहे. शेख या मंगळवारी (दि.१२) सकाळच्या सुमारास रमजान निमित्त सुरू असलेल्या उपवासाचे पदार्थ खरेदीसाठी बागवानपुरा भागात गेल्या असता ही घटना घडली. आझाद चौकात त्या गर्दीत खरेदी करीत असतांना अज्ञात भामट्यांनी त्यांच्या गळ््यातील पर्सची चैन उघडून पैसे ठेवण्याचे पाकिट चोरून नेले. या पाकिटात सोन्याचे कानातले,अंगठी आणि रोकड असा सुमारे ५३ हजाराचा ऐवज होता. अधिक तपास हवालदार पवार करीत आहेत.
