इंडिया दर्पण ऑनलाईन डेस्क
मनमाड : शिवप्रतिष्ठान हिंदुस्थानचे संभाजी भिडे यांची गाडी अडवून त्यांच्यावर हल्ला करण्याचा प्रयत्न मनमाड येथे रात्री साडेअकरा वाजता झाला. भिडे हे येवल्याहून मालेगावच्या दिशेने जात असताना आंबेडकर अनुयायांनी त्यांची गाडी अडवून काळे झेंडे दाखवून जोरदार घोषणाबाजी केली. आक्रमक झालेल्या काहींनी थेट भिडे यांच्या गाडीवर हल्ला करण्याचा प्रयत्न केला.
भिडे हे मालेगावला जात असताना मनमाड येथे त्यांचा ताफा अडवण्याचा प्रयत्न करण्यात आला. भिडे मुर्दाबादच्या घोषणा या वेळी देण्यात आल्या. अश्लील शब्दातही घोषणाबाजी करण्यात आली. काळे झेंडे दाखून त्यांच्या गाडीवर हल्ला करण्याचा प्रयत्न झाला. या वेळी काही तरुण आणि तरुणी भिडे यांच्या गाडीला आडवे झाले. त्यांची गाडी अडवून जोरजोराने बडवण्यात आली. पोलिसांनी घोषणाबाजी करणाऱ्यांना बाजूला केले.
काळे झेंडे दाखवणाऱ्या आणि गाडीवर हल्ला करण्याचा प्रयत्न करणाऱ्या कार्यकर्त्यांना मनमाड पोलिसांनी ताब्यात घेतले आहे. पोलिसांनी संभाजी भिडे यांना बंदोबस्तात धुळ्याकडे रवाना केले. भिडे हे येवल्याहून मालेगावच्या दिशेने जाणार असल्याची माहिती मिळताच आंबेडकर अनुयायांनी जोरदार घोषणाबाजी करत भिडे यांचा ताफा अडवला. गाडीत पुढील सीटवर भिडे बसलेले होते. या वेळी आक्रमक झालेल्या कार्यकर्त्यांनी काचावर आणि गाडीच्या पुढील भागावर जोरजोरात हाताने मारले. एकाने पायातील बूट काढून गाडीवर मारला. पोलिसांनी रस्ता मोकळा करून दिल्यावर भिडे मालेगावच्या दिशेने रवाना झाले.
