नाशिक (इंडिया दर्पण वृत्तसेवा) – अन्न व औषध प्रशासनाच्या परिमंडळ ४ मध्ये शिंदे पळसे गावामध्ये संजय तुळशीराम झाडे या विक्रेच्या गोदामावर पथकाने धाड टाकली. या ठिकाणी हिरा पानमसाला व इतर १२ प्रकारचे महाराष्ट्रात बंदी असलेले प्रतिबंधित अन्न पदार्थाचा २ लाख ५६ हजार २६५ रुपये किंमतीचा साठा जप्त करण्यात आला.
हा साठा महाराष्ट्र राज्यात विक्रीसाठी प्रतिबंधित असल्याकारणाने या कार्यालयाचे अन्न सुरक्षा अधिकारी गोपाल कासार यांनी अनौपचारीक नमुने घेवून ताब्यात घेतला. त्यामुळे या प्रकरणातील विक्रेत्यावर नाशिक रोड पोलिस स्टेशनमध्ये अन्न सुरक्षा व मानदे कायदयाअंतर्गत गुन्हा दाखल करण्यात आला आहे. सदर प्रतिबंधित अन्नपदार्थांचे पुरवठादार, उत्पादकापर्यन्त तपास करण्याबाबत फिर्याद नोंदविण्यात आली आहे. पुढील तपास नाशिक रोड पोलिस स्टेशनमार्फत करण्यात येत आहे.
सदरची कारवाई, सहायक आयुक्त (अन्न) विवेक पाटील यांच्या नेतृत्वाखाली अन्न सुरक्षा अधिकारी गोपाल कासार, श्रीमती सु. दे. महाजन व अविनाश दाभाडे, अन्न सुरक्षा अधिकारी (गुप्तवार्ता), यांच्या पथकाने सह आयुक्त (नाशिक विभाग) सं.भा.नारागुडे यांच्या मार्गदर्शनाखाली करण्यात आली.
