इंडिया दर्पण ऑनलाईन डेस्क
लखनऊः उत्तर प्रदेशातील शाहजहांपूर जिल्ह्यात दाट धुक्यामुळे ट्रक आणि टेम्पोची धडक झाली. या अपघातात १२ जणांचा जागीच मृत्यू झाला. आपल्या प्रियजनांच्या निधनानंतर कुटुंबीयांनी आक्रोश केला. या अपघातात काही जण गंभीर जखमी झाले आहेत. जखमींना जवळच्या रुग्णालयात दाखल करण्यात आले.
फर्रुखाबाद रस्त्यावर ट्रक आणि टेम्पोमध्ये हा अपघात झाला. भरधाव वेगाने जाणारा ट्रक आणि टेम्पोची समोरासमोर धडक झाली. टेम्पोमधून प्रवास करणाऱ्या बहुतांश प्रवाशांना आपला जीव गमवावा लागला आहे. अपघाताची माहिती मिळताच पोलिस प्रशासन घटनास्थळी दाखल झाले. पोलिसांनी जखमींना रुग्णालयात दाखल केले. सेहरा मऊ दक्षिण पोलिस ठाण्याच्या हद्दीत ही घटना घडली. ट्रकच्या धडकेने टेम्पोचे तुकडे झाले. पोलिस येण्यापूर्वी रस्त्यावरून जाणाऱ्या वाहनांचे चालक आणि प्रवाशांनी अपघातस्थळी बचावकार्य सुरू केले. भरधाव ट्रकच्या धडकेने टेम्पोचा चक्काचूर झाला. टेम्पोचे काही भाग तुटून रस्त्यावर विखुरले.
या भीषण अपघातानंतर इतर वरिष्ठ पोलिस अधिकारीही घटनास्थळी पोहोचले. मृतदेहांची ओळख पटवली जात आहे. याशिवाय जखमींवर योग्य उपचार करण्यासाठी अधिकाऱ्यांनी रुग्णालय प्रशासनाला आवश्यक सूचना दिल्या आहेत. दोन आठवड्यांपूर्वी शाहजहांपूरमध्ये भरधाव येणाऱ्या ट्रकखाली स्कूटरस्वार चिरडवला होता. स्कूटरस्वार ट्रकच्या चाकाखाली आला होता. त्याला ट्रकसह सुमारे १०० मीटरपर्यंत ओढले गेले. या भीषण घटनेत स्कूटरस्वाराला आपला जीव गमवावा लागला.
