अहमदनगर (इंडिया दर्पण वृत्तसेवा)- एसटी, ट्रॅक्टर आणि इको गाडी या तिन्हींच्या विचित्र अपघातात सहा जण ठार झाल्याची घटना घडली. ढवळपुरी फाट्यानजीक नगर-कल्याण रस्त्यावर आज पहाटे अडीच वाजता हा अपघात झाला. या अपघातानंतर नगर-कल्याण महामार्गावर काही काळ वाहतूक कोंडी झाली होती.
मुंबईकडून नगरकडे येणाऱ्या एसटीची ऊस वाहतूक करणाऱ्या ट्रॅक्टरला जोराची धडक बसली. त्याचवेळी पाठीमागून येणाऱ्या इको गाडीची एसटीला धडक बसली. तीन वाहनांच्या धडकेत पाच जण जागीच ठार झाले. एका जखमीचा रुग्णालयात दाखल केल्यानंतर मृत्यू झाला.
या घटनेची माहिती मिळताच पोलिसांनी घटनास्थळी धाव घेतली आहे. या घटनेतील जखमींना परिसरातील नागरिकांनी पोलिसांच्या मदतीने रुग्णालयात दाखल केले. अपघातात जागीच मृत्यू झालेल्या व्यक्तींचे मृतदेह शवविच्छेदनासाठी नगर येथील शासकीय रुग्णालयात पाठवण्यात आले आहेत.
