इंडिया दर्पण ऑनलाईन डेस्क
भाजप सरकार विरोधकांना घाबरवण्यासाठी ईडी, सीबीआय, आयटीचा खुलेआम वापर करत असल्याची टीका काँग्रेसचे राष्ट्रीय अध्यक्ष मल्लिकार्जुन खरगे यांनी केला. त्यांनी आज पत्रकार परिषद घेत भाजप सरकारवर हल्लाबोल केला.
यावेळी ते म्हणाले की, हे लोक विरोधी पक्षाच्या लोकांना पकडतात तेव्हा त्यांच्यावर कोणतीही केस लादतात. पण तो माणूस भाजपमध्ये दाखल होताच त्याची प्रतिमा स्पष्ट होते. शेवटी हा न्याय कुठे आहे? असा प्रश्नही त्यांनी केला.
यावेळी त्यांनी भारत जोडो न्याय यात्रेच्या लोगोचे प्रकाशन केले. या यात्रेविषयी बोलतांन ते म्हणाले की, आम्ही ‘भारत जोडो न्याय यात्रे’मध्ये सामील होण्यासाठी भारत आघाडीच्या नेत्यांना, विविध राज्यांतील काँग्रेस मित्रपक्षांना आणि नागरी समाजाला आमंत्रित केले आहे.
यात्रेदरम्यान त्या सर्व लोकांच्या भेटीगाठी आणि चर्चा होणार आहे. ‘भारत जोडो न्याय यात्रे’चे व्यासपीठ स्वयंसेवी संस्था, पत्रकार, शेतकरी, छोटे व्यापारी, दलित-मागासवर्गीय, आदिवासी आणि बुद्धीजीवी वर्ग यांना जोडण्यासाठीही आहे. केवळ आपले मत लोकांपर्यंत पोहोचवण्यासाठीच नाही तर जनतेचा आवाज आणि त्यांच्या समस्या ऐकण्यासाठीही ही यात्रा आहे.
