भारताचा न्यूझीलंडवर ६५ धावांनी विजय; सूर्यकुमारची शानदार शतकी खेळी

इंडिया दर्पण ऑनलाईन डेस्क – भारत आणि न्यूझीलंड यांच्यातील तीन सामन्यांच्या टी२० मालिकेतील दुसरा सामना भारताने ६५ धावांनी जिंकला आहे. मालिकेतील पहिला सामना पावसामुळे होऊ शकला नव्हता. त्या सामन्यात नाणेफेकही होऊ शकली नाही. अशा स्थितीत हा सामना जिंकून भारताने मालिकेत १-० अशी आघाडी घेतली आहे.

न्यूझीलंडने नाणेफेक जिंकून प्रथम गोलंदाजी करण्याचा निर्णय घेतला आणि सूर्यकुमारच्या शतकी खेळीमुळे भारताने प्रथम फलंदाजी करताना न्यूझीलंडसमोर १९२ धावांचे लक्ष्य ठेवले. त्याचवेळी न्यूझीलंडसाठी टीम साऊदीने हॅट्ट्रिक घेतली. प्रत्युत्तरात किवी संघ १८.५ षटकांत केवळ १२६ धावाच करू शकला आणि ६५ धावांनी सामना गमावला. या सामन्यात नाणेफेक हरल्यानंतर प्रथम फलंदाजी करताना भारताने सहा गडी गमावून १९१ धावा केल्या. भारताकडून सूर्यकुमार यादवने नाबाद १११ धावांची खेळी केली. ईशान किशनने ३६ धावा केल्या आणि हार्दिक-श्रेयसने १३-१३ धावांची खेळी केली. न्यूझीलंडकडून टीम साऊदीने तीन आणि लोकी फर्ग्युसनने दोन विकेट घेतल्या.

१९२ धावांच्या लक्ष्याचा पाठलाग करताना न्यूझीलंडची सुरुवात खराब झाली. डावाच्या दुसऱ्या चेंडूवरच पहिली विकेट पडली. फिन ऍलन खाते न उघडताच बाद झाला. यानंतर कॉनवे आणि विल्यमसन यांनी ५६ धावांची भागीदारी केली, मात्र सुंदरने कॉनवेला बाद करून किवीजवर दबाव आणला. पुढच्याच षटकात चहलने ग्लेन फिलिप्सला बाद केले आणि सामन्यावरील भारताची पकड घट्ट झाली. यानंतर, किवीज नियमित अंतराने विकेट गमावत राहिले आणि अखेरीस १८.५ षटकांत १२६ धावांत गुंडाळले. कर्णधार विल्यमसनने सर्वाधिक ६१ आणि कॉनवेने २५ धावा केल्या. या दोघांशिवाय ग्लेन फिलिप्स (१२ धावा) आणि डॅरिल मिशेल (१० धावा) यांनाच दहाचा आकडा गाठता आला.

भारताकडून दीपक हुडाने सर्वाधिक चार विकेट घेतल्या. मोहम्मद सिराज आणि युजवेंद्र चहलने प्रत्येकी दोन बळी घेतले. भुवनेश्वर कुमार आणि सुंदरला प्रत्येकी एक विकेट मिळाली. अर्शदीप हा एकमेव भारतीय गोलंदाज होता ज्याला एकही विकेट मिळाली नाही. या सामन्यात सूर्यकुमार यादवने शतक झळकावले. हे त्याचे भारतासाठी टी-२० क्रिकेटमधील दुसरे शतक ठरले. या वर्षी त्याने इंग्लंडविरुद्ध पहिले शतकही झळकावले. रोहित शर्मानंतर एका वर्षात दोन शतके करणारा तो दुसरा भारतीय ठरला आहे. त्याचबरोबर या सामन्यात हॅट्ट्रिक घेणारा टीम साऊथी टी-२० मध्ये दोन हॅट्ट्रिक घेणारा जगातील दुसरा गोलंदाज ठरला आहे. यापूर्वी त्याने पाकिस्तानविरुद्ध हॅट्ट्रिक घेतली होती. टी२० मध्ये दोन हॅट्ट्रिक घेणारा लसिथ मलिंगा हा पहिला गोलंदाज आहे.

India take a 1-0 lead in the T20I series with a convincing win at the Bay Oval 🙌

Watch the #NZvIND series live on https://t.co/MHHfZPyHf9 (in select regions) 📺 pic.twitter.com/VZLav2DFQh

— ICC (@ICC) November 20, 2022

India vs New Zealand T20 Match Suryakumar Centaury