इंडिया दर्पण ऑनलाईन डेस्क – प्रभाकर पणशीकर यांच्या ‘तो मी नव्हेच’ या नाटकातील लखोबा लोखंडे या पात्राची कॉपी वाटतील असे काही कलंदर गुन्हेगार आजही आपल्या आसपास असतात. असाच एक लखोबा ईडीने ताब्यात घेतला आहे. दहा राज्यांमध्ये २७ बायका करणारा हा नवरा सध्या संपूर्ण देशात चर्चेचा विषय ठरत आहे.
रमेश स्वॅन अर्थात बिभू प्रकाश स्वॅन असे त्याचे नाव असून त्याला मनी लॉंड्रिंगच्या प्रकरणात अटक करण्यात आली आहे. ईडीने त्याला ताब्यात घेतल्यानंतर चौकशी केली तेव्हा त्याच्यातील लखोबा उघडकीस आला. त्याने दहा राज्यांमध्ये तब्बल २७ महिलांसोबत लग्न केलं आणि त्यानंतर त्यांची फसवणूक करून फरार झाला. ज्या बायकांसोबत त्याने लग्न केली, त्या सर्व महिला डॉक्टर, सीए यासारख्या मोठ्या हुद्द्यावर काम करणाऱ्या होत्या, हे विशेष.
आयटीबीपीची एक सहायक कमांडंट, आसाममधील डॉक्टर, छत्तीसगडची चार्टर्ड अकाउंटेंट, सर्वोच्च न्यायालय आणि दिल्ली उच्च न्यायालयाची वकील, केरळच्या प्रशासकीय सेवेतील अधिकारी अश्या महिलांचा यात समावेश आहे. त्याला 2011मध्ये हैदराबाद येथे अटक करण्यात आली होती. तुमच्या मुलांना एमबीबीएसमध्ये प्रवेश देतो असं सांगून काही पालकांकडून एकूण 2 कोटी रुपये उकळल्याचा त्याच्यावर आरोप होता. या प्रकरणात त्याला अटक करण्यात आली होती. एवढेच नव्हे तर त्याने 2006मध्ये केरळच्या 13 बॅकांना 128 बनावट क्रेडिट कार्डच्या माध्यमातून एक कोटीची फसवणूक केली होती. या प्रकरणातही त्याला अटक करण्यात आली होती.
आर्थिक खात्यांची चौकशी
पोलिसांनी फसवणुकीच्या प्रकरणात स्वॅनची पत्नी डॉ. कमला सेठी, तिची सावत्र बहीण आणि डॉक्टरांना अटक केली होती. मात्र, नंतर त्यांची जामिनावर सुटका केली. स्वॅन 66 वर्षांचा आहे. त्याला ताब्यात घेण्यासाठी ओडिशा पोलीस ईडीच्या संपर्कात आहे. त्याच्या सर्व फसवणुकीच्या प्रकरणांचा तपास सुरू आहे. त्याच्या खात्यांची चौकशी करून आर्थिक देवाणघेवाणीची माहिती घेतली जात आहे. त्याची सखोल चौकशी करण्यासाठी पोलिसांनी रिमांड मागितली आहे.
ED Arrest Ramesh Swan 10 States 27 Wife Money Laundering
