दिंडोरी – दिंडोरी नगर पंचायत नगराध्यक्ष निवडणुकीत भाजप नगर सेवक तटस्थ राहणार असल्याची माहिती गटनेत्या सौ. अरुणा रणजित देशमुख यांनी दिली आहे. दिंडोरी नगरपंचायत नगराध्यक्ष उपनगराध्यक्ष निवडणूक 15 फेब्रुवारी रोजी होत असून त्या पार्श्वभूमीवर भाजप गटनेत्या सौ.अरुणा रणजित देशमुख यांनी प्रसिध्दी पत्रकाद्वारे माहिती दिली आहे.
त्यात म्हटले आहे की, दिंडोरी नगरपंचायत निवडणुकीत माजी आमदार रामदास चारोस्कर यांच्या नेतृत्वाखाली शिवसेना व काँग्रेस आघाडीच्या सर्वाधिक 8 जागा निवडून आल्या. दिंडोरीकरांनी राष्ट्रवादी काँग्रेस पक्षाच्या विरोधात कौल दिला. त्या जनमताचा आदर राखून भाजप नगरसेवकांनी चारोस्कर गटासोबत सत्ता स्थापन करण्याचा निर्णय वरिष्ठ नेत्यांशी चर्चा करून घेतला होता. त्याप्रमाणे भाजपच्या नगरसेवकांनी चारोस्कर गटाला आपला निर्णय कळवला. परंतु माजी आमदार चारोस्कर गटाच्या सर्व अटी शर्ती मानून सुद्धा अचानकपणे चारोस्कर गट व राष्ट्रवादी यांच्यात आघाडी झाल्याचे चारोस्कर गटाकडून समजले. त्यामुळे भाजपचे चारही नगरसेवक पुढील कार्यकाळात सक्षम विरोधी पक्षाची भूमिका जनतेच्या हितासाठी बजावण्यास तयार आहेत. भाजपने जनमताचा आदर राखत नगरपंचायत अध्यक्ष, उपाध्यक्ष निवडणुकीत तटस्थ भूमिका घेतली आहे. यापुढे जनतेच्या प्रश्नावर लढत राहू असे गटनेत्या अरुणा रणजित देशमुख यांनी सांगितले.
असे आहे पक्षीय बलाबल
शिवसेना ६
काँग्रेस २
राष्ट्रवादी काँग्रेस ५
भाजप ४
नगराध्यक्ष व उपनगराध्यक्षपदासाठी बहुमताचा आकडा ९ आहे. त्यामुळे शिवसेना, काँग्रेस व राष्ट्रवादी या महाविकास आघाडीचे संंख्याबळ तूर्ततरी जुळते आहे. प्रत्यक्षात निवड होईपर्यंत आणखी काय घडामोडी घडतात, याकडे सगळ्यांचे लक्ष लागले आहे.
