नवी दिल्ली (इंडिया दर्पण वृत्तसेवा) – संपूर्ण देशाला हादरवून सोडणाऱ्या श्रद्धा हत्याकांडानंतर आता एकापेक्षा एक खुलासे होत आहेत. हत्येचा आरोपी आफताब अमीन पूनावालच्या क्रूरतेने आणि निर्दयतेने सर्वांनाच हादरवून सोडले आहे. श्रद्धाची हत्या केल्यानंतर आफताबने गुगलवर काही बाबी सर्च केल्या होत्या. त्यात रक्त कसे स्वच्छ करावे आणि मानवी शरीरशास्त्र याबाबत त्याने गुगल सर्च केल्याचे दिल्ली पोलिसांनी सांगितले आहे.
दिल्ली पोलिसांच्या चौकशीत हे स्पष्ट झाले आहे की, १८ मे रोजी आफताबने श्रद्धाची हत्या केली होती आणि त्यानंतर मृतदेहाची विल्हेवाट लावण्याचा कट रचला होता. त्याने पोलिसांना चौकशीदरम्यान सांगितले की, त्याने गुगलवर मानवी शरीरशास्त्राबद्दल वाचले होते, जेणेकरून त्याला श्रद्धाच्या शरीराचे तुकडे करण्यात मदत होईल. पोलिसांनी सांगितले की त्यांनी आफताबचे इलेक्ट्रॉनिक गॅझेट जप्त केले असून त्याची कसून चौकशी केली जाईल.
या इलेक्ट्रॉनिक वस्तूंची चौकशी केल्यानंतर पोलीस आफताबची ही कबुली खरी मानतील. गुगल सर्च केल्यानंतर त्याने श्राद्धाच्या रक्ताचे डाग जमिनीवरून साफ केले, असे पोलिसांनी सांगितले. यासाठी त्याने केमिकलचा वापर केला आणि घाणेरडे कपडे फेकून दिले. त्यानंतर त्याने मृतदेह बाथरूममध्ये ठेवला आणि जवळच्या दुकानातून फ्रीज विकत आणला. नंतर मृतदेहाचे अनेक तुकडे करून फ्रीजमध्ये ठेवले.
त्याच खोलीत तो झोपायचा
दिल्ली पोलिसांना श्रद्धाच्या वडिलांकडून तक्रार मिळाल्यानंतर १० नोव्हेंबरला एफआयआर नोंदवण्यात आला. तेव्हापासून पोलीस या प्रकरणाचा सखोल तपास करत होते. पोलिसांनी सांगितले की, आफताब रोज त्याच खोलीत झोपायचा ज्या खोलीत त्याने श्रद्धाचे अनेक तुकडे केले होते. श्रद्धाच्या मृतदेहाचे तुकडे फ्रिजमध्ये ठेवल्यानंतर तो अनेकदा तिचा चेहरा पाहायचा. फ्रीजमधून सर्व अवयव फेकून दिल्यानंतर आफताबने फ्रीजही साफ केला होता.
अनेक मुलींशी संबंध
सूत्रांच्या हवाल्याने असेही सांगितले जात आहे की, श्रद्धापूर्वी आफताबचे अनेक मुलींसोबत संबंध होते. हा गुन्हा करण्यापूर्वी त्याने अनेक गुन्हेगारी चित्रपट आणि वेब सिरीज पाहिल्या होत्या. त्यात डेक्सटर या अमेरिकन क्राईम ड्रामा सिरीजचाही समावेश आहे. लग्नाच्या कारणावरून त्यांच्यात अनेकदा भांडण झाल्याची कबुली आफताबने दिली आहे. या प्रकरणी सध्या आफताबविरुद्ध भारतीय दंड संहितेच्या कलम ३०२ आणि २०१ अंतर्गत गुन्हा दाखल करण्यात आला आहे. याप्रकरणी मेहरौली पोलीस ठाण्यात गुन्हा दाखल करण्यात आला आहे.
श्रद्धाचे ३५ तुकडे
दिल्ली पोलिसांनी सहा महिन्यांच्या एका अंध खून प्रकरणाचा खुलासा केला तेव्हा सर्वांचेच डोळे पाणावले. पोलिसांनी तिच्या हत्येप्रकरणी २८ वर्षीय श्रद्धाच्या लिव्ह-इन पार्टनरला पकडले. हत्येनंतर आफताबने श्रद्धाच्या मृतदेहाचे ३५ तुकडे केल्याचा आरोप आहे. हे तुकडे त्याने दिल्लीच्या वेगवेगळ्या भागात नेऊन फेकले. आफताब हा मुंबईचा रहिवासी आहे. श्रद्धाच्या वडिलांनी तक्रार केली ही त्यांची मुलगी बेपत्ता आहे. त्यानंतर आफताबला दिल्लीतून पकडण्यात आले. न्यायालयाने आरोपी आफताबला ५ दिवसांची पोलीस कोठडी सुनावली आहे.
अशी झाली ओळख
आफताब आणि श्रद्धा यांची ओळख पहिल्यांदा एका डेटिंग साइटवर झाली होती. यानंतर दोघेही मुंबईतील एका कॉल सेंटरमध्ये भेटले. दोघेही जवळपास ३ वर्षे लिव्ह-इन रिलेशनशिपमध्ये राहिले आणि नंतर ते दिल्लीला शिफ्ट झाले. येथे आल्यानंतर श्रद्धाने आफताबवर लग्नासाठी दबाव टाकला. दोघे छतरपूर येथे भाड्याच्या घरात राहत होते. लग्नाच्या दबावामुळे आफताबने श्रद्धाची निर्घृण हत्या केली.
Delhi Shraddha Murder Case Police Investigation
