इंडिया दर्पण ऑनलाईन डेस्क – प्रियकर आणि प्रेयसी हे एकमेकांच्या प्रेमात इतके आकंठ बुडालेले असतात की, त्यांना त्या दोघांमध्ये तिसरा कोणीही व्यक्ती नको असतो, मात्र त्यात प्रेमाचा त्रिकोण तयार झाला तर मात्र वाद वाढून भांडण विकोपाला जाते. त्यातून मग एखाद्याचा बळी देखील जाऊ शकतो. अशा प्रकारची अमेरिकेत घटना घडली.
एका महिलेने तिच्या प्रियकराची ‘फसवणूक’ केल्यामुळे त्याची हत्या केल्याचा आरोप आहे. गेलिन मॉरिस नावाच्या २६ वर्षीय महिलेला प्रियकर स्मिथची वागणूक संशयास्पद वाटली. तिने प्रियकराचा पाठलाग केला. मॉरिसने एका साक्षीदाराला सांगितले की, तिने Apple Airtag आणि GPS वापरून स्मिथचा माग काढला. तेव्हा तिला दिसून आले की प्रियकर स्मिथ हा दुसर्‍या महिलेसोबत बारमध्ये होता.
हे पाहून मॉरिसने रिकाम्या दारूच्या बाटलीने त्या महिलेवर हल्ला करण्याचा प्रयत्न केला. मात्र, स्मिथने हा हल्ला थोपवला. अखेर बार कर्मचाऱ्यांनी तिघांना बारमधून बाहेर पडण्यास सांगितले. मात्र बारमधून बाहेर पडल्यानंतर मॉरिसने स्मिथला ठार मारण्यासाठी कट रचला. मॉरिसने एकदा नव्हे तर तब्बल तिनदा कार स्मिथच्या अंगावर चढवली. या गंभीर अपघातात स्मिथचा जागीच मृत्यू झाला. स्मिथला मारल्यानंतर मॉरिस त्या दुसऱ्या महिलेवर प्राणघातक हल्ला करण्यासाठी कारमधून उतरली, पण तोपर्यंत पोलिस पोहोचले होते. आणि पोलिसांनी मॉरिसला अटक केली.
