इंडिया दर्पण ऑनलाईन डेस्क – सामान्य कुटुंबातून आलेल्या मुलीने दहावीनंतर शाळेत जाणे सोडून दिले होते. परंतु ती इतकी लफ्फेदार इंग्रजी बोलत होती, की चांगले शिकलेले लोक लाजतील. या मुलीचे मोठमोठे छंद होते. या ओघात ती देहविक्रय व्यवसायात जोडली गेली. पाहता पाहता तिने मोठे नेटवर्क बनवले. त्यानंतर सेक्स रॅकेटची क्वीन अशी तिची ओळख बनली. या मुलीचे नाव आहे गीता अरोरा ऊर्फ सोनू पंजाबन.
रिक्षाचालक वडील
मूळच्या हरियाणामधील रोहतक जिल्ह्यातील रहिवासी गीताचा जन्म दिल्लीच्या गीता कॉलनीत १९८१ साली झाला होता. खूपच सामान्य कुटुंबातून येणार्या गीता अरोराचे वडील पोट भरण्यासाठी रिक्षा चालवत होते. परंतु लहानपणापासूनच चमकदार जीवन जगण्याची इच्छा असलेल्या गीताने दहावीनंतर शिक्षण सोडून दिले. नंतर ती ब्यूटि पार्लर चालवू लागली.
ज्याच्यांशी लग्न केले त्यांचे मृत्यू
सुरुवातीपासून लहान-मोठे गुन्हे करणार्या गीताने रोहतकच्या कुख्यात गँगस्टर विजय सिंह याच्यासोबत लग्न केले. परंतु १९९८ मध्ये एसटीएफने विजय सिंहला एका चकमकीत ठार केले. विजयसोबत राहून तिने अनेक मोठ्या गुन्हेगारांशी संपर्क केला होता. त्यानंतर ती नजफगढच्या वाहनचोरी करणार्या दीपकला भेटली. परंतु २००३ मध्ये आसाम पोलिसांनी दीपकचे एन्काउंटर केले. याच वर्षी गीताने कॉल गर्लचे काम सुरू केले होते. त्याचदरम्यान तिची दीपकचा भाऊ हेमंत सोनूशी जवळीक वाढली. त्याच्याशी नंतर तिने लग्न केले. परंतु २००६ मध्ये हेमंतसुद्धा पोलिसांच्या एन्काउंटरमध्ये मारला गेला.
EC अशी झाली सोनू पंजाबन
वर्ष २००६ मध्ये जेव्हा हेमंत सोनूचा मृत्यू झाला तेव्हा गीताने हेमंतचे सोनू हे आडनाव आपल्या नावाच्या आधी लावण्यास सुरुवात केली. त्यानंतर तिने स्वतःची सोनू पंजाबन या नावाने ओळख बनवली. हेमंतच्या गुंडाच्या मदतीने एक सेक्स रॅकेट नेटवर्क तयार केले. या नेटवर्कमध्ये तिने दलालांच्या माध्यमातून देहविक्रय व्यवसाय मोठ्या प्रमाणात वाढवला. त्यामुळे तिला २००७ आणि २००८ रोजी प्रीतविहार आणि साकेत पोलिसांनी अटक केली होती. नंतर ती जामिनावर बाहेर आली.
मकोका, पण त्यातून सुटका
२०११ मध्ये सोनूला देहविक्रय व्यवसायाशी संबंधित प्रकरणात अटक करण्यात आली होती. तिच्यावर या वेळी मकोका (महाराष्ट्र कंट्रोल ऑफ ऑर्गनाइज्ड क्राइम अॅक्ट १९९९) लावण्यात आला. सोनू देहविक्रय व्यवसायाचे रॅकेट चालवत असल्याचे पुरावे पोलिस सादर करू शकले नाहीत. परंतु याच कामातून सोनूने दिल्ली-हरियाणामध्ये कोट्यवधींची मालमत्ता खरेदी केली होती.
एक केस आणि सोनू कारागृहात
एका मुलीने सोनू आणि संदीपवर अपहरण, बलात्कार आणि जबरदस्तीने देहविक्रय व्यवसायात ढकलण्यासह अनेक आरोप केले होते. मुलीने आरोप केला की, ती बारा वर्षांची असताना संदीपने लग्नाचे आमिष दाखवून बलात्कार केला आणि त्यानंतर दहा वेगवेगळ्या ग्राहकांना विकले. त्यानंतर ती सोनूकडे आली तेव्हा तिला सोनूने देहविक्रय व्यवसायात ढकलले. तिच्यावर अनेक प्रकारचे अत्याचार केले. तिच्या तावडीतून कशीबशी सुटका झाल्यावर मुलीने सोनू आणि संदीपविरुद्ध पोलिसांत तक्रार दाखल केली.
याच प्रकरणात दिल्लीच्या द्वारका न्यायालयाने सोनू पंजाबन आणि साथीदार संदीपला दोषी ठरविले होते. एक महिला असतानाही सोनूने नैतिकतेच्या सर्व सीमा पार केल्या. त्यामुळे तिची जागा कारागृहातच आहे, असे मत न्यायालयाने नोंदवले. या प्रकरणी सोनूला दोषी मानून २४ वर्षांची शिक्षा ठोठावण्यात आली. सोनूला शिक्षा झालेले हे पहिले प्रकरण आहे.
