नाशिक : त्र्यंबकरोडवर राज्य उत्पादन शुल्क विभागाने मोठी कारवाई करत मद्यवाहतूक करणा-या औरंगाबाद येथील एकास अटक केली आहे. या कारवाईत कारसह तब्बल दहा लाखाचा मद्यसाठा जप्त करण्यात आला आहे. ही कारवाई भरारी पथक क्रमांक एकच्या पथकाने केली आहे. विक्रम आगाजी साळुंखे (२९ रा.भरतनगर ता.जि.औरंगाबाद) असे अटक केलेल्या संशयीताचे नाव आहे. पथकाचे दुय्यम निरीक्षक अरूण सुत्रावे यांना मिळालेल्या माहितीवरून ही कारवाई करण्यात आली. त्र्यंबकरोडवरून मोठ्याप्रमाणात केंद्रशासित प्रदेशातील दारूची वाहतूक होत असल्याची माहिती पथकास मिळाली होती. त्यानुसार बुधवारी (दि.९) पहाटेच्या सुमारास पथकाने बेळगाव ढगा येथे नाकाबंदी केली असता संशयीत मद्यसाठ्यासह पथकाच्या हाती लागला. वाहनतपासणीत एमएच १२ एचएम ९६९९ या एक्सयुव्ही या कारमध्ये ब्लेंडर प्राईड,ब्लेंडर व्हिस्की,रॉयल चॅलेंज,मॅकोनटोश व्हिस्की,मॅकडॉल,मॅजिक मोमेंट व्होडका,ओल्ड मन आदीप्रकारचा मद्यसाठा मिळून आला. पथकाने संशयीतास अटक करीत वाहनासह सुमारे १० लाख १२० रुपए किमतीचा मुद्देमाल हस्तगत केला असून अधिक तपास दुय्यम निरीक्षक सुत्रावे करीत आहेत. ही कारवाई निरीक्षक जयराम जाखोरे,ब विभागाचे सुनिल देशमुख, दुय्यम निरीक्षक सुत्रावे,यशपाल पाटील,जवान सुनिल दिघोळे,धनराज पवार, एम.पी.भोये,राहूल पवार व अनिता भांड आदींच्या पथकाने केली.
त्र्यंबकरोडवर राज्य उत्पादन शुल्क विभागाची मोठी कारवाई; दहा लाखाचा मद्यसाठा जप्त, एकास अटक
