नाशिक : चोरीचे सोने खरेदी करणा-या सराफासह घरफोडी करणा-या तीघा चोरट्यांना पोलिसांनी गजाआड केले आहे. ही कारवाई मध्यवर्ती गुन्हे शाखेच्या पथकाने केली असून या चोरट्यांना नाशिकरोड पोलिसांच्या ताब्यात देण्यात आले आहे.
अटक केलेल्यांमध्ये सोनू उर्फ अरबाज रफिक बेग (२४),शहेबाज गुलाम हुसेन शेख (२० रा.दोघे पंचशिलनगर,गंजमाळ) व समीर हमीद शहा (२२ रा.बजरंगवाडी,नाशिक पुणा रोड) अशी संशयीत चोरट्यांची तर चोरीचे सोने खरेदी करणा-या राजेंद्र बुधू सोनार (रा.कपालेश्वर नगर,औरंगाबादरोड) असे सराफाचे नाव आहे.
या कारवाई बाबात पोलीसांनी माहिती देतांना सांगितले की, मध्यवर्ती शाखेचे हवालदार शेरखान पठाण यांना मिळालेल्या माहितीच्या आधारे ही कारवाई करण्यात आली. पंचशिल भागातील त्रिकुटाने नाशिकरोड भागात घरफोडी केल्याची माहिती पोलीसांना मिळाली होती. त्यानुसार पथकाने पंचशिलनगर येथील साठ फुटी मार्गावर सापळा लावला. त्यावेळेस तीघे संशयीत पोलिसांच्या जाळयात अडकले. पोलीस तपासात त्यांनी गुह्याची कबुली देवून चोरीचे सोने राजेंद्र सोनार यांनी खरेदी केल्याची माहिती दिल्याने सोनार यांना अटक करण्यात आली. त्यांना नाशिकरोड पोलीसांच्या ताब्यात देण्यात आले आहे. ही कारवाई पोलीस निरीक्षक डॉ.अंचल मुदगल यांच्या मार्गदर्शनाखाली निरीक्षक कुंदन जाधव,सहाय्यक निरीक्षक धर्मराज बांगर,हवालदार सुनिल भालेराव,किशोर देसले,सुहास क्षिरसागर,गंगाधर केदार,रामकृष्ण वाघ,दीपक पाटील आदींच्या पथकाने केली.
