नाशिक : शहरात मोटारसायकल चोरीचे सत्र सुरूच असून वेगवेगळय़ा ठिकाणी पार्क केलेल्या तीन दुचाकी चोरट्यांनी पळवून नेल्या. याप्रकरणी मुंबईनाका,पंचवटी आणि इंदिरानगर पोलीस ठाण्यात नोंदी करण्यात आल्या असून भामट्यांचा बंदोबस्त करावा अशी मागणी जोर धरू लागली आहे. सिडकोतील उत्तम नगर भागात राहणारे राकेश अंबादास कदम (रा.शिवपुरी चौक) हे सोमवारी (दि.१५) रात्री मुंबईनाका भागात आले होते. सीएनएस हॉस्पिटील समोर त्यांनी आपली अ‍ॅक्टीव्हा एमएच ४१ एडी ७८१६ पार्क केली असता चोरट्यांनी ती चोरून नेली. याप्रकरणी मुंबईनाका पोलीस ठाण्यात चोरीचा गुन्हा दाखल करण्यात आला असून अधिक तपास पोलीस नाईक गांगुर्डे करीत आहेत. दुसरी घटना पंचवटीतील कृष्णनगर भागात घडली. पुनम मनोज बैरागी (रा.गिता संकुल,कृष्णनगर) यांनी तक्रार दाखल केली आहे. बैरागी यांची अ‍ॅक्टीव्हा एमएच १५ डीएफ ५७९५ सोमवारी (दि.१५) रात्री त्यांच्या सोसायटीच्या पार्किंगमध्ये लावलेली असतांना चोरट्यांनी ती पळवून नेली. याप्रकरणी पंचवटी पोलीस ठाण्यात चोरीचा गुन्हा दाखल करण्यात आला असून अधिक तपास पोलीस नाईक खाजेकर करीत आहेत. तर पाथर्डी फाटा भागातील आशिष वसंत राजगुरू (रा.लोकपुरम सोसा.स्वराज्य नगर) यांची पल्सर एमएच १५ एचबी १५४३ गेल्या ३१ नोव्हेंबर रोजी रात्री त्यांच्या सोसायटीच्या पार्किंगमध्ये लावलेली असतांना चोरट्यांनी चोरून नेली. याप्रकरणी इंदिरानगर पोलीस ठाण्यात नोंद करण्यात आली असून अधिक तपास हवालदार शेख करीत आहेत.
नाशिक – वेगवेगळय़ा ठिकाणी पार्क केलेल्या तीन दुचाकी चोरट्यांनी केल्या लंपास
