नाशिक : दरोडा टाकण्याचा प्रयत्नातील तीघांना पोलीसांनी बेड्या ठोकल्या. संशयीतांच्या ताब्यातून दुचाकीसह लोखंडी कोयता,गज मिरचीपुड आदी दरोड्याचे साहित्य हस्तगत करण्यात आले आहे. याप्रसंगी पोलीसांची चाहूल लागताच संशयीतांचे दोन साथीदार पसार झाले असून, त्यांचा शोध सुरू आहे. याप्रकरणी पंचवटी पोलीस ठाण्यात गुन्हा दाखल करण्यात आला आहे. सागर विठ्ठल जाधव (मुळ रा.शिवमी जि.जळगाव हल्ली लक्ष्मी स्विटजवळ,त्रिमुर्तीचौक सिडको),कुणाल विजय थोरात (रा.म्हाडा बिल्डींग,एरंडवाडी) व अजय भाऊसाहेब माळेकर (रा.वाडिवºहे ता.इगतपुरी हल्ली राहूलवाडी) अशी दरोड्याच्या प्रयत्नात अटक केलेल्या संशयीतांची नावे आहेत. पंचवटी पोलीसांचे गस्ती पथक मंगळवारी (दि.१२) मध्यरात्री मार्केट यार्डात गस्त घालत असतांना संशयीत मिळून आले. मार्केट यार्डातील प्रमोद व्हेजीटेबल कंपनी समोर ते संशयास्पद आढळून आल्याने पोलीसांनी त्यांना हटकले असता टोळक्याने पळून जाण्याचा प्रयत्न केला. चौघांना पाठलाग करून पोलीसांनी जेरबंद केले असून त्यांचे दोन साथीदार अंधाराचा फायदा उचलत पळून जाण्यात यशस्वी झाले आहेत. संशयीतांच्या अंगझडतीत धारदार कोयता,लोखंडी गज आणि मिरचीपुड आदी साहित्य मिळून आले असून अधिक तपास सहाय्यक निरीक्षक पवार करीत आहेत.
