नाशिक- आडगावला इनोव्हा कारमध्ये सहा लाख रुपयांचा साठ किलो गांजा जप्त

आडगावला इनोव्हा कारमध्ये साठ किलो गांजा 
नाशिक – आडगाव पोलिस ठाणे हद्दीतील नववा मैल रस्त्यावर पांढऱ्या रंगाच्या इनोव्हा कारमध्ये साठ किलो गांजा मिळून आला. पोलिसांनी जवळपास सहा लाख रुपयांच्या गांजासह सात लाख रुपयांची कार असा एकूण सुमारे तेरा लाख रुपयांचा मुद्देमाल जप्त केला आहे. या प्रकरणी आडगाव पोलिसांनी अज्ञात व्यक्ती विरुद्ध गुन्हा दाखल केला आहे. पुढील तपास पोलिस करीत आहेत. याबाबत माहिती अशी की, शुक्रवारी पहाटे आडगाव पोलिस ठाण्याच्या गुन्हे शोध पथकातील कर्मचारी कर्मचारी दहावा मैल परिसरात गस्त घालत होते. नववा मैलजवळ पांढऱ्या रंगाची इनोव्हा कार पार्किंग लाइट सुरू करून उभी होती. पोलिसांच्या निदर्शनास आले त्यानंतर गाडी जवळ जाऊन पाहिले. गाडीत दोन गोण्यांमध्ये काहीतरी संशयास्पद वस्तू दिसली. ही माहिती रात्र गस्तीवर असलेल्या पोलीस निरीक्षक अशोक साखरे यांना कळविण्यात आली, त्यानंतर पोलिस घटनास्थळी दाखल झाले. गाडीचा दरवाजा उघडला असता मागील सीटवर दोन गोण्या आढळून आल्या. त्या गोण्या उघडून बघितल्या असता त्यात गांजा असल्याचे निष्पन्न झाले.

…..

दारु प्यायला पैसे न दिल्याने मारहाण

नाशिक – ठक्कर बाजार परिसरातील महाराष्ट्र ॲक्वेरियम दुकानासमोर शुक्रवारी दारुला पैसे दिले नाही म्हणून तिघांनी एकाला बेदम मारहाण केली. याप्रकरणी सागर शरद सोनवणे (वय २८, दामोधर निवास सोनवणे वाडा) याच्या तक्रारीवरुन सरकारवाडा पोलिस ठाण्यात अमित दत्तात्रय व्यवहारे (वय २९, रामवाडी पंचवटी) आणि वैभव प्रकाश बागूल याच्यासह आणखी एक अशा तिघांवर मारहाणीचा गुन्हा दाखल झाला आहे. सागर सोनवणे हा शुक्रवारी (ता.९) दुपारी पावने तीनच्या सुमारास ठक्कर बाजारातील महाराष्ट्र ॲक्वेरियम या माशांच्या दुकाना गेला असता तेथे भेट झालेल्या दत्तात्रय व्यवहारे व वैभव बागूल याच्यासह तिघांनी त्याकडे दारु पिण्यासाठी पैसे मागितले पण सागरने पैसे न दिल्याने तिघांनी शिवीगाळ करीत लाथा बुक्यांनी आणि हातातील लोखंडी गजाने मारहाण केली. पोलिसांनी तिघा संशयितांना अटक केली आहे.