वाराणसी – तब्बल १०८ वर्षांपूर्वी कॅनडात चोरुन नेण्यात आलेली अन्नपूर्णा देवीची मूर्ती अखेर आज काशीमध्ये विराजमान झाली आहे. मुख्यमंत्री योगी आदित्यनाथ यांच्या हस्ते या मूर्तीची प्रतिष्ठापना करण्यात आली आहे. कॅनडा सरकारने ही मूर्ती भारतीय अधिकाऱ्यांकडे सुपूर्द केली आहे. त्यानंतर आज विधीवत पूजाविधीने ही मूर्ती काशीमध्ये पुन्हा स्थानापन्न झाली आहे.
ही मूर्ती कॅनडातील रेजिना विद्यापीठात सापडली. वर्ल्ड हेरिटेज सप्ताहात भारतीय कलाकार दिव्या मेहरा यांची नजर या मूर्तीवर गेली, आणि त्यांनी हा विषय लावून धरला. अधिक माहिती घेतल्यानंतर हे लक्षात आलं की, मॅकेंझी यांनी १०० वर्षांपूर्वी भारताला भेट दिली होती. त्यावेळी ते वाराणसी येथेही आले होते. अन्नपूर्णा मंदिरातून या मूर्तीची चोरी करून ती तेथे पोहोचवण्यात आली असावी असा अंदाज आहे. या मूर्तीच्या एका हातात खीर तर दुसऱ्या हातात अन्न आहे.
रेजिना विद्यापीठात ही मूर्ती होती. विद्यापीठाचे उपकुलगुरू थॉमस चेस यांनी कॅनडातील भारतीय उच्चाधिकारी अजय बिसारिया यांना एका व्हर्च्युअल कार्यक्रमात या मूर्तीची माहिती दिली. या बैठकीला मॅकेन्झी आर्ट गॅलरीचे तसेच कॅनडा बॉर्डर सर्व्हिसेस एजन्सीचे प्रतिनिधी उपस्थित होते.
विभागीय पुरातत्त्व अधिकारी डॉ. सुभाषचंद्र यादव यांनी सांगितले की, ही मूर्ती भारतात आल्यानंतर नंतर सर्व प्रक्रिया पूर्ण करण्यात आली. कर्नाटकमधून चोरीला गेलेल्या मूर्ती काही दिवसांपूर्वी जेव्हा भारतात आणण्यात आल्या तेव्हा त्या कर्नाटक सरकारकडे सुपूर्द करण्यात आल्या. त्यामुळेच ही मूर्ती आता काशी येथे आणण्यात आली.
