विशेष प्रतिनिधी, अलीगढ ( उत्तर प्रदेश ) :
भारतीय जनता पक्षाच्या देशभरातील सर्वच छोट्या, मोठया कार्यालयात पंतप्रधान नरेंद्र मोदी यांच्यासह वरिष्ठ नेत्यांची छायाचित्रे लावलेली असतात. तसेच संबंधित राज्यांत वरिष्ठ पदाधिकाऱ्यांची देखिल छायाचित्रे लावलेली असून सर्व कार्यकर्त्यांना याचा अभिमान वाटतो. परंतु भाजपमधील एका कार्यालयात घुसून एका गुंडाने राजकीय नेत्यांचे फोटो तथा पोस्टर फाडल्याने मोठी खळबळ उडाली आहे.
भारतीय जनता पक्षाच्या उत्तर प्रदेशातील भुजपुरा कार्यालयावर एका गुंडाने गोंधळ घातला आणि कार्यालयातील पंतप्रधान नरेंद्र मोदी आणि मुख्यमंत्री योगी आदित्यनाथ यांची पोस्टर्स फाडली, त्यामुळे तिथे खूप गोंधळ उडाला. यावेळी कार्यालयात उपस्थित पदाधिकारी व कामगारांनी विरोध केला असता त्यांना जीवे मारण्याची धमकी देऊन तो पळून गेला. भाजप अल्पसंख्यांक सेल महानगर अध्यक्ष इम्रान सैफी यांनी भुजपुरा भागात भाजप कार्यालय सुरू केले असून रात्री कार्यालयात महानगर अध्यक्ष इम्रान सैफी हे संजय शर्मा यांच्यासह इतर कामगारांसोबत बैठक घेत होते. या बैठकीला सुमारे १०० कामगार उपस्थित होते. सभा संपल्यानंतर कामगार तेथून निघू लागले, तेव्हा तहरीर बाबू नावाचा एक तरुण तेथे आला आणि पंतप्रधान आणि मुख्यमंत्र्यांची पोस्टर्स पाहून त्यांना शिवीगाळ करण्यास सुरुवात केली.
दरम्यान, त्याने तेथे गोंधळ सुरू केला व पोस्टर फाडले. यानंतर त्या आरोपींनी कार्यालयात उपस्थित असलेल्या खुर्च्या उखडण्यास सुरुवात केली. आरोपींनी कार्यालयात उपस्थित असलेल्या कार्यकर्त्यांना धमकी दिली की, जर यापुढे भाजपची बैठक येथे आयोजित केली गेली तर कार्यालय बॉम्बने उडवून देईल. भाजप कार्यकर्त्यांनी पोलिसांना या प्रकरणाची माहिती दिली. मात्र पोलीस येण्यापूर्वीच आरोपी घटनास्थळावरून पळून गेला. पोलिसांनी तहरीर बाबू आणि त्याचा भाऊ तन्वीर यांच्या विरोधात गुन्हा दाखल केला आहे.
