अमरावती दंगल प्रकरणी भाजप नेते डॉ. अनिल बोंडे यांना अटक

मुंबई – त्रिपुरा मधील कथीत घटनेचे महाराष्ट्रात दोन दिवसांपूर्वी तीव्र पडसाद उमटले, त्यातूनच अमरावती, नांदेड, मालेगाव सारख्या शहरांमध्ये दंगली सदृश्य घटना घडल्या. यात मोठ्या प्रमाणावर तोडफोड झाली. अमरावतीची दंगल तर देशपातळीवर गाजली. त्यामुळेच तेथील इंटरनेट सेवा सध्या बंद करण्यात आली असून संचारबंदीही लागू आहे. अशा स्थितीतच या दंगलीचा कट रचल्याप्रकरणी भाजप नेते डॉ. अनिल बोंडे यांना पोलिसांनी अटक केली आहे. त्यांच्याविरुद्ध गुन्हाही दाखल करण्यात आला आहे. दरम्यान, अमरावती दंगल प्रकरणी राष्ट्रवादी काँग्रेसचे प्रवक्ते नवाब मलिक यांनी अनेक गंभीर आरोप केले आहेत.

मलिक यांनी आज यासंदर्भात पत्रकार परिषद घेतली. ते म्हणाले की, अमरावती दंगल ही खुद्द भाजप नेत्यांनीच घडवून आणली. इतकेच नव्हे तर भाजप नेते अनिल बोंडे यांनीच दंगलीचा कट रचला होता. दंगल भडकवण्यासाठी मुंबईतून पैसे आले होते. भाजपच्या एका आमदाराने हे पैसे वाटले होते, असा खळबळजनक दावा मलिक यांनी केला आहे.  भाजपने बंदच्या आडून सुनियोजितपणे दंगली भडकवण्याचं काम केले, मात्र पोलिसांनी हा कट उधळून लावला. तसेच राज्यात दंगल भडकवण्याचे भाजपचे षडयंत्र होते. राज्यातील जनतेने संयम राखला. त्यामुळे राज्यात इतर ठिकाणी दंगली भडकल्या नाही. अमरावतीत कोणत्याही दोन समुदायात दंगल झाली नाही, असेही मलिक म्हणाले.

भाजप नेते अनिल बोंडे यांनी २ तारखेच्या रात्री दंगलीचं षडयंत्रं रचले होते. त्याकरिता दारुच्या बाटल्या वाटण्यात आल्या. पैसे वाटण्यात आले आणि दंगल भडकावण्यात आली. अशी पोलीस चौकशीत माहिती मिळाली आहे. मुंबईतून दंगली भडकवण्यासाठी पैसे गेले. आमदाराच्या माध्यमातून या पैशाचं वाटप करण्यात आले. त्याचीही चौकशी सुरू आहे, असा गंभीर आरोप मलिक यांनी केला.

त्रिपुरातील घटनेनंतर मुस्लिम समाजात नाराजी होती. त्यामुळे मुस्लिम संघटनांकडून बंदचे आवाहन करण्यात आले होते. त्याचे राज्यात त्याचे पडसाद उमटले होते. पोलिसांनी घटनेला नियंत्रित केले. ज्यांनी पोलिसांवर दगडफेक केली. अशा सर्व संशयिताविरोधात गुन्हे दाखल करून अटक सुरू केली आहे, असेही मलिक यांनी सांगितले.

दंगलीप्रकरणी राष्ट्रवादीच्या मालेगावातील नगरसेवकावर गुन्हा दाखल केला असल्याचे सांगितले जात आहे. मात्र ते काही खरे नाही. कारण कागदपत्रावर ते राष्ट्रवादीचे नगरसेवक आहेत. पण प्रत्यक्षात ते एमआयएममध्ये आहेत. त्यापैकी एका नगरसेवकावर गुन्हा दाखल झाला आहे. त्यामुळे तो राष्ट्रवादीचा नगरसेवक आहे हे म्हणणे योग्य नाही, असे मलिक म्हणाले. दरम्यान, दंगल भडकविणे, दंगलीसाठी प्रवृत्त करणे यासंदर्भातील गुन्हे बोंडे यांच्या विरोधात लावण्यात आले आहेत. बघा, मलिक यांची संपूर्ण पत्रकार परिषद

https://www.facebook.com/NawabMalikOfficial/videos/281109393948795/