नवी दिल्ली (इंडिया दर्पण वृत्तसेवा) – केंद्रीय रस्ते वाहतूक आणि महामार्ग मंत्रालयाने सीएनजी कारचालकांसाठी मोठी घोषणा केली आहे. पेट्रोल, डिझेल बीएस६ कारमध्ये सीएनजीसोबत एलपीजी किटच्या रेट्रो फिटमेंटला परवानगी देण्यात आली आहे. याचा ग्राहकांना मोठा दिलासा मिळणार आहे. या निर्णयामुळे येत्या काळात मोठ्या प्रमाणात सीएनजी कार वाढण्याची चिन्हे आहेत.
मंत्रालयाने दिलेल्या माहितीनुसार, ३.५ टनांपेक्षा कमी वजनाच्या बीएस६ वाहनांच्या बाबतीत डिझेल इंजिनऐवजी सीएनजी, एलपीजी इंजिन बसवता येईल. मंत्रालयाने बीएस६ पेट्रोल वाहनांवर सीएनजी आणि एलपीजी किटचे रेट्रो – फिटमेंट आणि ३.५ टनपेक्षा कमी असलेल्या बीएस६ वाहनांच्या बाबतीत सीएनजी, एलपीजी इंजिनबरोबर डिझेल इंजिनमध्येही बदल करण्याची परवानगी दिली आहे.
सीएनजी हा पर्यावरणाच्या दृष्टीकोनातून अतिशय चांगला पर्याय मानला जातो. कारमधून होणारे कार्बन उत्सर्जन कमी करण्यास सीएनजीमुळे मदत होते. तर पेट्रोल किंवा डिझेल गाड्या सीएनजी कारच्या तुलनेत कार्बन मोनोक्सॉइड, हायड्रोकार्बन्स, कण आणि धूर जास्त प्रमाणात सोडतात. म्हणून पर्यावरण प्रदूषण कमी करण्यासाठी देशात सीएनजी कारच्या वापराला प्रोत्साहन देण्याचा प्रयत्न सरकारकडून केला जात आहे. शिवाय, सीएनजी वाहने पेट्रोल किंवा डिझेन वाहनांपेक्षा जास्त मायलेजदेखील देतात.
१ एप्रिल २०२० पासून बाजारात केवळ बीएस६ वाहने आणण्यात येत आहेत. बीएस६ म्हणजे भारत स्टेज उत्सर्जन मानक हे वाहनांच्या इंजिनमधून कार्बन डायऑक्साईड, सल्फर, नायट्रोजन ऑक्साईड यासारख्या प्रदूषकांचे मोजमाप करण्याची ही पद्धत आहे. आता बाजारात हीच वाहने येत असली तरी बीएस४ प्रकारची जी वाहने बाजारात होती ती बंद करण्यात आलेली नाही. मात्र, जनतेचा कलही आता बीएस६ प्रकारच्या वाहनांकडे वाढत असल्याने येत्या काळात याच वाहनांची संख्या अधिक असल्याचे दिसून येईल.
Big Announcement for CNG Car
Automobile Petrol BS6 Modi Government Union
CNG LPG Kit
