मुंबई (इंडिया दर्पण वृत्तसेवा) – राज्यातील सत्ता संघर्ष प्रकरणी सर्वोच्च न्यायालयाने अंतिम निकाल जाहीर केला आहे. त्यानंतर संपूर्ण राज्याचे लक्ष विधानसभा अध्यक्ष राहुल नार्वेकर यांच्याकडे लागले आहे. नार्वेकर सध्या लंडन दौऱ्यावर आहेत. त्यांनी दूरध्वनीद्वारे माध्यमांशी संपर्क साधला आहे. विविध विषयांबाबत त्यांनी माहिती दिली आहे.
सर्वोच्च न्यायालयाच्या निर्णयानंतर विधानसभा अध्यक्ष राहुल नार्वेकर म्हणाले की, राजकीय पक्ष म्हणून शिवसेना हा खरा कोणता गट आहे? आता सर्व प्रथम ते ठरवावे लागेल. योग्य वेळेत मी ही प्रक्रिया पूर्ण करेन आणि त्यानंतर आमदारांच्या अपात्रतेचा प्रश्न निकाली निघेल.
राहुल नार्वेकर सध्या लंडनमध्ये असून, मी सर्वोच्च न्यायालयाच्या आदेशाचे पालन करतो, असे त्यांनी पत्रकारांना सांगितले. राजकीय पक्षाला मान्यता देण्याची जबाबदारी सर्वोच्च न्यायालयाने अध्यक्षांवर सोपवली आहे. मी ही प्रक्रिया योग्य वेळेत पूर्ण करेन. नैसर्गिक न्यायाच्या तत्त्वांनुसार, सर्व याचिकाकर्त्यांना त्यांची बाजू मांडण्याची संधी दिली जाईल. या प्रक्रियेत दाव्यांची तपासणी आणि चर्चाही केली जाईल, असे त्यांनी स्पष्ट केले.
सर्वोच्च न्यायालयाने आमदारांना अपात्र ठरवण्याची आपली भूमिका कायम ठेवल्याचा दावाही नार्वेकर यांनी केला. मुख्यमंत्री एकनाथ शिंदे यांच्यासह १६ आमदारांच्या अपात्रतेच्या याचिकेवर निर्णय घेणे हा सभापतींचा विशेषाधिकार असेल, असे न्यायालयाने म्हटले आहे. मी सतत सांगत आलो आहे की (या विषयावर) निर्णय अध्यक्षांनाच घ्यायचा आहे.
Assembly Speaker Rahul Narvekar on Supreme Court Verdict
