विशेष प्रतिनिधी, मुंबई
मुंबई शहरात अंबानी यांच्या घराजवळ स्फोटक सामग्रीसह आढळलेले वाहन परत मिळवण्याच्या प्रकरणात मुंबईचे माजी पोलिस आयुक्त परमबीर सिंग यांनी ‘अत्यंत संशयास्पद’ भूमिका घेतली होती, असा आरोप राज्याचे माजी गृहमंत्री अनिल देशमुख यांनी केला. तसेच देशमुख म्हणाले की, परमबीर सिंग यांनी माझ्यावर सूडबुद्धीने भ्रष्टाचाराचे खोटे आरोप केले आणि त्यामुळेच आम्ही न्यायासाठी मुंबई उच्च न्यायालयात ठोठावले.
अनिल देशमुख पुढे म्हणाले की, पूर्वी महाराष्ट्र होमगार्डचे महासंचालक म्हणून नियुक्त असलेल्या परमबीर सिंगविरोधात पोलिस विभागातील अधिकारी आणि काही व्यावसायिकांनी खंडणी व भ्रष्टाचाराचे आरोप केले आहेत. सीबीआयने परंबीर सिंग यांनी माझ्यावर लावलेल्या खोट्या आरोपाच्या आधारे गुन्हा दाखल केला आहे. त्यामुळे मी न्यायासाठी उच्च न्यायालयात धाव घेतली आहे. तसेच ते म्हणाले, ‘परमबीर सिंग यांच्याविरूद्ध भ्रष्टाचाराच्या आरोपाची बातमी वाहिन्यांमध्ये दररोज पाहायला मिळत आहे. मला वाटते की एनआयए या प्रकरणात परमबीर सिंगच्या संशयी भूमिकेची चौकशी करेल.
दरम्यान, मुंबईचे माजी पोलिस आयुक्त परमबीर सिंग यांनी राज्याचे मुख्यमंत्री उद्धव ठाकरे यांना लिहिलेल्या पत्राद्वारे अनिल देशमुख यांनी निलंबित मुंबई पोलिस अधिकारी सचिन वाझे यांना दरमहा १०० कोटी रुपये वसूल करण्याचे लक्ष्य दिल्याचा आरोप केला होता. अनिल देशमुख यांनी हे आरोप फेटाळून लावले. परंतु मुंबई उच्च न्यायालयाने सीबीआय चौकशीचे आदेश दिल्यानंतर देशमुख यांना या पदाचा राजीनामा द्यावा लागला. सध्या या प्रकणी सीबीआय चौकशी सुरू आहे.
