इंडिया दर्पण ऑनलाईन डेस्क
उत्तर प्रदेशमधील अमेठीत अज्ञात लोकांनी शिक्षकांच्या अख्ख्या कुटुंबाला गोळी मारुन संपवल्याची धक्कादायक घटना घडली. या घटनेत शिक्षक सुनीलकुमार, त्यांच्या पत्नी, पाच आणि दीड वर्षाच्या लेकींचा मृत्यू झाला. सुनीलकुमार हे कंपोजिट विद्यालयात सहायक शिक्षक होते. गुरुवारी सायंकाळी ही घटना घडली.
या शिक्षकाचे कुटंब हे शिवतरगंज पोलिस ठाण्याच्या हद्दीतील अहोरवा भवानी परिसरातील चौकात भाड्याच्या घरात वास्तव्यास होते. याच घरात असलेल्या नळाजवळ पती – पत्नीचे मृतदेह पडलेले सापडले. तर काही अंतरावरच दोन लेकरांचे मृतदेह होते. शेजा-यांनी चौघांना सीएचसी सिंहपूरला नेले. येथील डॅाक्टरांनी चौघांना मृत घोषित केले. या घटनेची माहिती मिळताच पोलिस घटनास्थळी पोहचले. सुनील कुमार यांच्या घरात काही अज्ञात शिरले. त्यांच्याकडे दोन बंदुका होत्या. त्यांनी ९ गोळ्या झाडल्या. त्यात या चौघांचा मृत्यू झाला.
हे असेल कारण?
सुनीलकुमार यांच्या पत्नीने १८ ऑगस्ट रोजी रायबरेलीतील चंदन वर्माच्या विरोधात छेडछाड आणि मारहाणीची तक्रार नोंदवली होती. पोलिसांनी या तक्रारीवरुन चंदनविरोधात गंभीर कलमांच्या अंतर्गत गुन्हे दाखल केले होते. या घटनेमागे हे कारण आहे का या दिशेने आता पोलिस तपास करत आहे.
