छत्रपती संभाजी नगर ( इंडिया दर्पण वृत्तसेवा) – केंद्रीय गृहमंत्री अमित शाह यांचा काल छत्रपती संभाजी नगर येथे कार्यकर्त्यांचा मेळावा घेतला. यावेळी त्यांनी मराठवाड्यातील ४६ पैकी ३० जागा जिंकायच्या असे सांगितले. त्यानंतर विधान परिषदेचे विरोधी पक्षनेते अंबादान दानवे यांनी अमित शाह व भाजपवर निशाणा साधला.
दानवे यांनी सोशल मीडियावर पोस्ट करत म्हटले की, मराठवाड्यातील ४६ पैकी ३० जागा जिंकायच्या असे गृहमंत्री अमित शहा म्हणाले. कार्यकर्त्यांच्या मनोबलाला तासाभराच्या भाषणाचा कितीही मोठा टेकू दिला तरी हा आकडा महायुतीला गाठता येणार नाही ही काळ्या दगडावरची पांढरी रेघ आहे! महाराष्ट्रातील सुरू आंदोलने आपण देशातील अन्य आंदोलनांशी जोडलीत आणि येथील आंदोलकांच्या मागण्यांना वाटण्याचा अक्षदा देण्याचा निर्णय जणू जाहीर करून टाकलाय. पण भाजपने हे ध्यानी ठेवावं की हा महाराष्ट्र आहे. इथे उत्तरेतील असली आक्रमणे खपवून घेतली जात नाहीत..
विधान सभेच्या निवडणुकीच्या पार्श्वभूमीवर अमित शाह दोन दिवसाच्या महाराष्ट्र दौ-यावर आहे. काल नागपूर व छत्रपती संभाजी नगर येथे त्यांनी भाजप पदाधिका-यांचा मेळावा घेतला. त्यानंतर आज त्यांचा नाशिक व कोल्हापूर दौरा आहे.
