नवी दिल्ली – इस्लामिक स्टेट आणि बोको हराम सारख्या दहशतवादी संघटनांशी हिंदु धर्माची तुलना केल्याबद्दल हिंदुत्व संघटनांकडून लक्ष्य करीत माजी केंद्रीय मंत्री व काँग्रेस नेते सलमान खुर्शीद यांच्या उत्तराखंडमधील नैनिताल येथील घराची तोडफोड आणि जाळपोळ करण्यात आली, त्यानंतर सलमान खुर्शीद यांनी तीव्र संताप व्यक्त करीत, ‘ हिंदू धर्माचा अभिमान आहे, त्यामुळे देशाला महान संस्कृती मिळाली आहे. तसेच हा हल्ला माझ्यावर नसून हिंदू धर्मावर आहे, ‘ असे उपरोधिकपणे म्हटले आहे.
सलमान खुर्शीद म्हणाले की, माझ्या पुस्तकात मी असे म्हटले आहे की, ‘हिंदू धर्म हा एक सुंदर धर्म आहे, ज्याने या देशाला एक अद्भुत संस्कृती दिली आहे आणि मला त्याचा अभिमान आहे.’ परंतु आता हा हल्ला माझ्यावर नाही तर हिंदू धर्मावर आहे. काही समाजकंटकांनी खुर्शीद यांच्या निवासस्थानाची तोडफोड केली आणि आग लावली. या प्रकरणी कुमाऊं पोलिसांनी २१ जणांविरुद्ध गुन्हा दाखल केला आहे.
अलीकडेच खुर्शीद यांच्या ‘सनराईज ओव्हर अयोध्या : नेशनहूड इन अवर टाइम्स’ या नवीन पुस्तकात त्यांनी हिंदू धर्म आणि कट्टरतावादी इस्लाम यांच्यात तुलना केली आहे. यावरून त्यांना मोठा विरोध होत आहे. यावर खुर्शीद यांनी सांगितले की, मला विरोध करत आहेत त्यांच्याशी चर्चा करण्यास तयार आहे. मी सर्वत्र सांगितले आहे की माझे दरवाजे उघडे आहेत. माझ्या घरादारावर आग लावण्याची काय गरज आहे? या माझ्याशी बोला कदाचित आपल्यातील संवाद हा आपल्या सामायिक जीवनाचा आधार बनू शकतो. खुर्शीद पुढे म्हणाले की, प्रसार माध्यमांना इतर नागरिक काय करत होते ते प्रसिद्ध करण्यात अधिक रस आहे. मात्र आपल्याला एकत्र येण्याची गरज आहे. कारण हा देश आता धर्माच्या नावावर अशा प्रकारची फाळणी सहन करू शकत नाही. तसेच खुर्शीद यांनी याआधीची आणि नंतरची फेसबुकवर घराची छायाचित्रे दाखवली आहेत.
