इंडिया दर्पण ऑनलाईन डेस्क – बॉलिवूडमधील सध्याच्या घडीची सर्वाधिक चर्चेत असलेली अभिनेत्री म्हणजे आलिया भट्ट. काही महिन्यांपूर्वी तिचे बाळंतपण झाले. आणि त्यानंतरही काहीच काळात तिने स्वतःला अगदी पूर्वीप्रमाणे मेन्टेन केले आहे. योग्य आहार आणि आवश्यक व्यायाम करून ती पुन्हा पूर्वपदावर आली आहे. आपल्या अभिनयाच्या जोरावर तिने स्वतःला सिद्ध करत या क्षेत्रात स्वतःचे स्थान निर्माण केले आहे.
आपल्या करिअरच्या बाबतीत ध्येयवादी असलेली आलिया भट्ट कायमच प्रसिद्धीझोतात असते. कधी स्टार किड्स म्हणून टीका तर कधी उत्तम अभिनेत्री म्हणून तिचे कौतुकही होत आहे. आलिया भट्टने आपल्या अभिनयाच्या जोरावर स्वतःला सिद्ध केलं आहे. आलियाने नुकताच तिचा वाढदिवस साजरा केला. त्याचे काही फोटोही समोर आले आहेत. मात्र यात एक विचित्र प्रकार घडल्याचे समोर आले. वाढदिवसाच्या फोटोवरून आलिया भट्ट अभिनेता वरुण धवनवर चांगलीच चिडल्याचे दिसते आहे.
वाढदिवसानिमित्त आलियाच्या चाहत्यांनी तिच्यावर शुभेच्छांचा वर्षाव केला. अनेक कलाकारांनी देखील तिला शुभेच्छा दिल्या. बॉलिवूडमधील तिचा मित्र-परिवार, कुटुंबियांनी आलियाला वाढदिवसाच्या शुभेच्छा दिल्या. यासह अभिनेता वरुण धवननेही इन्स्टाग्रामवर आलियाच्या वाढदिवसाबाबत पोस्ट केली. “आलिया तुला वाढदिवसाच्या शुभेच्छा. आता कुठे तू ३० वर्षांची झाली आहेस”, असे वरुणने म्हटले. या शुभेच्छा देताना वरुणने आलियाचा एक फोटोही सोबत शेअर केला आहे. या फोटोत ते दोघेही एका मंचावर मांडी घालून बसल्याचे पाहायला मिळत आहे. या फोटोवरुनच आलियाही वरुण धवनवर संतापल्याचे दिसत आहे.
आलियाने वरुणच्या या पोस्टवर कमेंट करत त्याला जाब विचारला आहे. “माझा यापेक्षा जास्त चांगला फोटो तू शेअर करू शकला असतास, मग हा फोटो का पोस्ट केलास?, असा सवाल आलियाने वरुणला विचारला आहे. त्यानंतर आलिया आणि वरुणमध्ये रंगलेले मजेशीर संभाषणही यात आपल्याला वाचायला मिळते. आलिया भट्ट आणि वरुण धवन हे एकमेकांचे खूप चांगले मित्र आहेत. त्या दोघांनी ‘स्टुडंट ऑफ द इअर’ या चित्रपटातून एकत्र करिअरला सुरुवात केली. त्यानंतर ते दोघेही ‘कलंक’ या चित्रपटात एकत्र दिसले. त्यांच्या या ऑनस्क्रीन जोडीला प्रेक्षकांनीही उत्तम प्रतिसाद दिला.
Actress Alia Bhat Angry on Actor Varun Dhawan
