नाशिक : महामार्गावरील सर्व्हीस रोडवर भरधाव अज्ञात चारचाकी वाहनाने दिलेल्या धडकेत दुचाकीस्वार ठार झाल्याची घटना घडली. याप्रकरणी आडगाव पोलीस ठाण्यात अपघाताची नोंद करण्यात आली आहे. राणोबा हिरामण कुवर असे अपघातात ठार झालेल्या दुचाकीस्वाराचे नाव आहे. याप्रकरणी अमोल पंडीत गुंजाळ (२५ रा.विंचुरगवळी ता.जि.नाशिक) यांनी तक्रार दाखल केली आहे. गुंजाळ व कुवर हे एकमेकांचे साले मेव्हणे असून ३१ जानेवारी रोजी दोघे दुचाकीवर प्रवास करीत असतांना हा अपघात झाला होता. हनुमाननगर येथून जत्रा हॉटेलच्या दिशेने दोघे साले मेव्हणे महामार्गाच्या सर्व्हीसरोडने प्रवास करीत असता लोकमान्य हॉस्पिटल भागात पाठीमागून येणा-या अज्ञात भरधाव चारचाकीने दुचाकीस धडक दिली होती. या अपघातात दुचाकीस्वार साला मेव्हणे जखमी झाले होते. जखमी अवस्थेत दोघांना रूग्णालयात दाखल केले असता मेव्हणे राणोबा कुवर यांचा उपचारादरम्यान मृत्यु झाला. अधिक तपास सहाय्यक निरीक्षक शिंदे करीत आहेत.
