आठवणीतील साहित्य संमेलन – वृत्तपत्रातून अनुभवलेले संमेलन

वृत्तपत्रातून अनुभवलेले अखिल भारतीय मराठी साहित्य संमेलन

• सौ. नीता सूर्यकांत सावंत

(श्री. गोविंद बालमंदिर माध्य. विद्यालय, आंबेवाडी, मोगरापाडा, अंधेरी (पूर्व) मोबाईल नं 9870088 915)

मराठी साहित्यातील दिवाळी म्हणजे दरवर्षी जोशात साजरं होणारं अखिल भारतीय मराठी साहित्य संमेलन. साहित्य संमेलनाच्या अध्यक्षपदापासून ते कुठे? केव्हा? कधी? सुरू होणार याची इत्यंभूत माहिती वृत्तपत्रांतून प्रसिद्ध होऊ लागतात.

साहित्य संमेलनाध्यक्षांची निवडणूक कधी अटीतटीची असते तर कधी समंजसपणाची. शालीन शाल पांघरलेली वृत्तपत्रांच्या रकान्यात याची माहिती प्रसिद्ध होऊ लागते. मित्रमैत्रीणी, घरचे ,ओळखीचे यांच्याशी मराठी साहित्य संमेलनाविषयी चर्चा सुरू होतात. वृत्तपत्रातील साहित्य संमेलनाची माहिती देणारी कात्रणे माझ्याकडे जमा होतात. हा सर्व ऐवज मी मराठी भाषा विषयाची शिक्षिका असल्याने माझ्या प्रिय विद्यार्थ्यांना वाचन कौशल्याद्वारे ऐकवत असते. वर्गात साहित्य संमेलनावर आधारित लेखांचे साग्रसंगीत वाचन करते, साहित्य संमेलनाविषयीची माहिती शाळेच्या काचदर्शिकेत लावली जाते.

वृत्तपत्रांतून प्रसिद्ध होणारे साहित्य संमेलनाची छायाचित्रे सारेच विद्यार्थी आवडीने पहातात. त्यावर चर्चा करतात.साहित्य संमेलनात निघालेली ग्रंथदिंडी, विविध विषयांवरील परिसंवाद, कविसंमेलन या सर्वांचा आनंद मी आणि माझे विद्यार्थी घेत असतो. खरं म्हणजे मी आणि माझे सारे विद्यार्थी संमेलन पूर्व आणि नंतर शाळेत यणाऱ्या सर्व वृत्तपत्रातून अ. भारतीय मराठी साहित्य संमेलने अनुभवत असतो. मला आणि माझ्या विद्यार्थ्यांना प्रत्यक्ष जरी समेलन स्थळी जाता आले नाही तरी वृत्तपत्रातील लेखाद्वारे व वृत्त पत्रातील संपादकीय विचारांनी त्यांचा अनुभव घेता येतो.

वृत्तपत्रातील छायाचित्रांच्या माध्यमातून विद्यार्थ्यांसमोर अखिल भारतीय साहित्य संमेलन उभं करते. माझ्या विद्यार्थ्यांच्या मनामनात मी भित्तीचित्र दर्शिकेतून दरवर्षी छान संकलन उभं करते.त्यावरील सर्व लेखांच्या कातरणाची लहानशी पुस्तिका तयार होते.तिचे मुखपृष्ठ सजते. प्रत्येक वर्षीचं असं हे चिरंतर टिकणारं मराठी भाषा साहित्याचं संकलन विद्यार्थ्यांच्या वाचन समृद्धीसाठी आणि मराठी भाषाप्रेस वृध्दींगत करण्यासाठी साकारत असत.
(आपणही आपला लेख 9422757523 या क्रमांकावर व्हॉटसअॅप करु शकता)