सेयूल – दक्षिण कोरियाची राजधानी सेयूलमध्ये हॅलोविन फेस्टिवलमध्ये झालेल्या चेंगराचेंगरीत १४९ हून अधिक जणांचा मृत्यू झाला आहे. तर १५० हून अधिक लोक जखमी झाले आहे. यात बहुतांश मृत्यू हा हृदयविकाराच्या झटक्याने झाला. या घटनेनंतर जखमी रुग्णांवर उपचार सुरु असून दक्षिण कोरियाचे राष्ट्रपती यंसुक यलोन यांनी या घटनेची माहिती मिळताच तातडीची बैठक बोलवली आहे. हॅलोविन पार्टीदरम्यान एका छोट्या रस्त्यावर अचानक गर्दी झाल्यामुळे ही चेंगारचेंगरीची घटना घडली. त्यानंतर ४०० हून अधिक आपतकालीन कर्मचारी घटनास्थळी पोहचले असून मदतकार्य सुरु करण्यात आले आहेत.
या फेस्टिवलमध्ये तब्बल एक लाख लोक उपस्थित होते. त्याचवेळी एका छोट्या रस्त्यावर चेंगराचेंगरी झाल्यामुळे ही दुर्घटना घडली. या घटनेनंतर अग्निशमन दलाने सांगितले की मोठ्या संख्येने लोक जमा झाल्याने बऱ्याच लोकांना श्वास घेण्यात अडचणी निर्माण झाल्या होत्या. त्यामुळे ह्रदयविकाराचा धक्का बसण्याच्या घटना घडल्या. कोरोनानंतर मोठ्या प्रमाणावर नो मास्क हॅलोवीन कार्यक्रम आयोजित करण्यात आला होता. त्यात ही दुर्घटना घडली. या घटनेत मृत्यूचा आकडा वाढण्याची शक्यता आहे.