मुंबई (इंडिया दर्पण वृत्तसेवा) – केंद्रीय अन्वेषण विभागाने (सीबीआय) गंगाखेडचे आमदार आणि उद्योजक रत्नाकर गुट्टे आणि ते संचालक असलेल्या गंगाखेड शुगर अँड एनर्जी लिमिटेडशी संबंधित अन्य प्रतिनिधींच्या विरोधात गुन्हा दाखल केला आहे. ४०९ कोटी रुपयांच्या कथित बँक फसवणुकीप्रकरणी दिल्ली सीबीआयकडून हा गुन्हा दाखल करण्यात आला आहे. तर, राष्ट्रवादी काँग्रेसचे माजी आमदार अनिल भोसले यांची २६ कोटींची मालमत्ता ईडीने जप्त केली आहे.
या प्रकरणात गंगाखेड शुगर अँड एनर्जी, परभणी, रत्नाकर गुट्टे, विष्णू मुंडे, कल्पना गुट्टे, सुनील गुट्टे, विजय गुट्टे व इतर अनोळखी आरोपीविरोधात गुन्हा दाखल करण्यात आला आहे. सीबीआयच्या अधिकाऱ्याने याबाबत माहिती दिली आहे. गुट्टे हे गंगाखेड शुगर अँड एनर्जी लिमिटेडच्या संचालकांपैकी एक आहेत. तक्रारीनुसार गंगाखेड शुगर अँड एनर्जी लिमिटेडने २००८ ते २०१५ दरम्यान युको बँकेच्या नेतृत्वाखालील बँकांच्या संघाकडून मुदत कर्ज, भांडवल सुविधा आणि इतर पत सुविधांच्या रूपात ५७७ कोटी १६ लाख रुपयांची विविध कर्जे घेतली. याप्रकरणी सीबीआयने नुकतेच नागपूर येथे दोन आणि परभणी येथे तीन ठिकाणी शोधमोहीम राबवली. युको बँकेचे उपमहाव्यवस्थापक मनोज कुमार आनंद यांनी याप्रकरणी सीबीआयकडे तक्रार केली होती.
माजी आमदार भोसलेंची मालमत्ता जप्त
राष्ट्रवादी काँग्रेसचे माजी आमदार अनिल भोसले यांच्यावरही शिवाजीराव भोसले बँक गैरव्यवहार प्रकरणी ईडीने कारवाई केली आहे. भोसले यांची पुणे व कोल्हापूर जिल्ह्यातील २६.६० कोटींची मालमत्त जप्त करण्यात आली आहे. शिवाजीराव भोसले बँक गैरव्यवहार प्रकरणात बँकेचे संचालक अनिल शिवाजीराव भोसले, सूर्याजी पांडुरंग जाधव, नूसर शनूर मुजावर यांच्यासह अन्य आरोपींच्या विरोधात पुणे पोलिसांच्या आर्थिक गुन्हे शाखेने कारवाई केली होती.
ठेवीदारांच्या पैशांचा अपहार
ठेवीदारांची ७१ कोटी रुपयांची फसवणूक केल्याप्रकरणी शिवाजीनगर जिल्हा सत्र न्यायालयाने भोसले यांच्या मालमत्तेवर गदा आणली होती. त्यानंतर ईडीने शिवाजीनगर पोलीस ठाण्यात स्वतंत्र गुन्हा दाखल केला होता. काळा पैसे हस्तांतरण कायद्याअंतर्गत कारवाई करण्यात आली होती. ठेवीदारांच्या पैशांचा अपहार, बनावट कर्ज प्रकरणे मंजूर करणे, ठेवीदारांचे पैसे त्यांनी अन्यत्र वळविल्याचा ठपका आरोपींवर आहे.
MLA FIR Registered and EX MLA Property ED Attached