नवी दिल्ली (इंडिया दर्पण वृत्तसेवा) – रॅपर आणि सुप्रसिद्ध पॉप सिंगर हनी सिंग आणि त्याची पत्नी शालिनी तलवार यांच्या घटस्फोटाच्या चर्चा गेल्या अनेक दिवसांपासून रंगल्या होत्या. आता त्यांचा कायदेशिररित्या घटस्फोट झाला आहे. दिल्लीतील जिल्हा न्यायालयाच्या कौटुंबीक न्यायालयाने दोघांचा घटस्फोट मंजूर केला आहे.
हनी सिंगची पत्नी शालिनी तलवार हिने हनी सिंगविरोधात कौटुंबिक हिंसाचाराची तक्रार दाखल करत दिल्लीच्या तीस हजारी कोर्टात घटस्फोटाचा अर्ज दाखल केला होता. त्यावर कोर्टात सुनावणी सुरू होती. कोर्टाने घटस्फोट मंजूर केल्यानंतर हनी सिंग आणि शालिनी यांचा ११ वर्षांचे वैवाहिक जीवन संपुष्टात आले आहे. पतीवर घरगुती हिंसाचार आणि इतर महिलांसोबत शारीरिक संबंधांसह अनेक गंभीर आरोप केले होते. हनी सिंग आणि शालिनी यांनी अनेक वर्षे एकमेकांना डेट केल्यावर लग्न करण्याचा निर्णय घेतला होता.
शालिनीने हनी सिंगकडून घटस्फोटाच्या बदल्यात सुमारे १० कोटी रुपयांची पोटगी मागितली होती, परंतु तिला पोटगी म्हणून १ कोटी रुपये देण्यात आले आहेत. हनी सिंगने शालिनीला न्यायालयात पोटगीचा एक कोटी रुपयांचा धनादेश सीलबंद कव्हरमध्ये शालिनीला दिल्याचे समोर आले आहे.
सासरच्यांवर गंभीर आरोप
गेल्या वर्षी ऑगस्टमध्ये शालिनी तलवारने पती हनी सिंगविरोधात मारहाण आणि हल्ला घरगुती हिंसाचाराचा गुन्हा दाखल केला होता. तिने पतीसोबतच सासरच्या लोकांवरही अनेक गंभीर आरोप केले होते. तिने दावा केला होता की, एक दिवस ती रूममध्ये कपडे बदलत होती तेव्हा तिचे सासरे सरबजीत सिंग दारूच्या नशेत खोलीत शिरले होते. सासऱ्यांनी चुकीच्या ठिकाणी स्पर्श करण्याचा प्रयत्न केल्याचा आरोपही तिने केला होता. याशिवाय शालिनीने पती हनी सिंगवर आरोप करत म्हटलं होतं की, लग्नानंतर हनी सिंग तिला मारहाण आणि शिवीगाळ करायचा. तसेच त्याचे लग्नानंतरही अनेक महिलांशी अवैध संबंध असल्याचा आरोप केला होता.
अशी होती प्रेमकहाणी
हनी सिंग आणि शालिनी यांची भेट शाळेत शिकत असताना झाली होती. इथून दोघांच्या मैत्रीला सुरुवात झाली आणि नंतर या मैत्रीचे रुपांतर हळूहळू प्रेमात झाले. या दोघांनी २३ जानेवारी २०११ रोजी पंजाबी रितीरिवाजानुसार गुरुद्वारामध्ये लग्न केले होते. मात्र हनी सिंगने जवळपास ४ वर्षे आपल्या लग्नाबद्दलची माहिती लपवून ठेवली होती.
Pop Singer Honey Singh and Wife Shalini Divorce
Entertainment