नवी दिल्ली (इंडिया दर्पण वृत्तसेवा) – अंमलबजावणी संचालनालयाने (ईडी) बुधवारी एका फर्मच्या गुप्त लॉकरमधून तब्बल ४७ कोटी ७६ लाख रुपयांचे सोने आणि चांदी जप्त केले आहे. मेसर्स रक्षा बुलियन आणि मेसर्स क्लासिक मार्बल्सच्या चार ठिकाणांवर ईडीने छापा टाकला. शोध मोहिमेनंतर ईडीने एकत्रितपणे ९१.५ किलो सोने आणि ३४० किलो चांदी जप्त केली आहे. त्याची अंदाजे किंमत ४७ कोटी ७६ रुपये एवढी असल्याचे सांगितले जात आहे.
अल्युमिनियम फॉइल कंटेनर आणि स्टोरेज अॅल्युमिनियम कंटेनर तयार करण्यात गुंतलेली मुंबईस्थित कंपनी मेसर्स पारेख अॅल्युमिनियम लिमिटेड विरुद्ध मनी लाँड्रिंगचा खटला सुरू आहे. या संदर्भात एजन्सीने इतर कंपन्यांचाही शोध घेतला. ईडीने ८ मार्च २०१८ रोजी मेसर्स पारेख अल्युमिनेक्स लिमिटेड विरुद्ध पीएमएलए, २००२ च्या तरतुदींनुसार मनी लाँड्रिंगचा गुन्हा नोंदवला होता. बुधवारी जारी केलेल्या निवेदनात ईडीने म्हटले आहे की, “कंपनीने बँकांची फसवणूक केली आणि त्यांच्याकडून २,२९६.५८ कोटी रुपयांचे कर्ज घेतले. त्यानंतर विविध कंपन्यांच्या माध्यमातून लेअरिंग करून पैशांची अफरातफर करण्यात आली. असुरक्षित कर्ज आणि गुंतवणूक देण्याच्या संदर्भात, पैसे विविध खात्यांमध्ये वळवले गेले. परंतु हा कर्ज घेण्याचा उद्देश नव्हता आणि अशा व्यवहारांसाठी कोणताही करार नव्हता.”
मेसर्स रक्षा बुलियनच्या आवारात खाजगी लॉकर्सच्या चाव्या सापडल्या. ईडीने सांगितले की, “खासगी लॉकर्सची झडती घेतली असता असे आढळून आले की लॉकर्स योग्य नियमांचे पालन न करता चालवले जात आहेत. कोणतेही केवायसी पाळले गेले नाही आणि आवारात सीसीटीव्ही कॅमेरे बसवले गेले नाहीत.”
ईडीने निवेदनात म्हटले आहे की, “कोणतेही ‘इन आणि आउट’ रजिस्टर नव्हते. लॉकर परिसराची झडती घेतल्यावर असे आढळले की तेथे ७६१ लॉकर्स आहेत, त्यापैकी ३ मेसर्स रक्षा बुलियनचे आहेत. लॉकर्स उघडल्यावर, २ लॉकरमध्ये ९१.५ किलो सोने आणि १५२ किलो चांदी आढळून आली आणि जप्त करण्यात आली. मेसर्स रक्षा बुलियनच्या आवारातून अतिरिक्त १८८ किलो चांदीही जप्त करण्यात आली. जप्त केलेल्या मालाची एकूण किंमत ४७.७६ कोटी रुपये आहे.” अँटी मनी लाँडरिंग एजन्सीने यापूर्वी २५ जून २०१९ रोजी ४६.९७ कोटी रुपये आणि ११ सप्टेंबर २०१९ रोजी १५८.२६ कोटी रुपये तात्पुरत्या स्वरुपात जप्त केले होते.
https://twitter.com/dir_ed/status/1569990818639024133?s=20&t=PjLOeYBmTJPDPTs9J6EPTg
91 KG Gold 340 KG Silver 761 Locker ED Raid
Searches 4 premises M/s Raksha Bullion & M/s Classic Marbles Money Laundering
M/s Parekh Aluminex ltd
