लासलगावातील मुलभूत नागरी समस्येबद्दल शहर विकास समिती  तर्फे निवेदन

लासलगांव – शहरातील मुलभूत नागरी समस्यांबद्दल नुकतेच लासलगाव शहर विकास समिती तर्फे उपविभागीय अधिकारी डॉ. अर्चना पठारे तसेच गटविकास अधिकारी संदीप कराड, पंचायत समिती उपसभापती संजय शेवाळे, सहायक पोलीस निरीक्षक खंडेराव रंजवे, ग्रामविकास अधिकारी शरद पाटील यांना निवेदन देण्यात आले.

लासलगांव शहरात गेल्या काही वर्षांपासून नागरिकांच्या मुलभूत नागरी समस्येकडे प्रशासनाचे दुर्लक्ष होत आहे. यासाठी तरुणांनी लासलगांव शहर विकास समिती स्थापन केली. त्याअंतर्गत नुकतेच अधिकाऱ्यांना निवेदन देण्यात आले. या  समितीत सर्व राजकीय पक्षाच्या तरुणांचा सहभाग आहे. लासलगांव शहराचा विकास करणे हा एकमेव उद्देश आहे.

या समितीने अधिका-यांना दिलेल्या निवेदनात म्हटले आहे की, दैनंदिन व्यवहार तसेच दुकाने रविवारी बंद असल्याने अनेकांची मोठ्या प्रमाणात गैरसोय होत आहे. अनेक व्यापाऱ्यांमध्ये सदरचा बंद हा शासकीय असल्याचा संभ्रम असल्याने दंडाच्या अथवा कारवाईच्या भीतीपोटी दुकाने उघडण्यास घाबरत आहे. मात्र सदरचा बंद हा स्वयंस्फूर्तीने केलेला होता. यापुढे रविवारी देखील सर्व दुकाने खुली राहून सर्व व्यवहार सुरळीत होणे आवश्यक आहे. शासकीय आदेशानुसार दुकाने उघडी ठेवण्याची वेळ ही सायंकाळी सात वाजेपर्यंत असतानादेखील कृषी उत्पन्न बाजार समितीमधील भोंगा हा पाच वाजता लावला जातो. त्यामुळे अनेक व्यापाऱ्यांमध्ये संभ्रम आहे. भीतीपोटी अनेक व्यापारी आपाआपली दुकाने पाच वाजता बंद करून घेतात सदरचा भोंगा हा त्वरित बंद करण्यात यावा.  शासनाने ठरवून दिलेल्या वेळेमध्ये तो वाजला जावा,
लासलगाव परिसरात स्टेशन रोडवरील खैरे कॉम्प्लेक्स, गुरुद्वारा या परिसरात विंचुर प्रकाशा महामार्गावर रस्त्याच्या कडेला भाजीपाल्याची सध्या विक्री होत आहे. त्यामुळे वाहतुकीसाठी अनेक अडथळे निर्माण होतात त्या ठिकाणी खूप मोठी गर्दी होते वर्दळीचा रस्ता असल्याने छोटे- मोठे अपघात होण्याची भीती व्यक्त केली जाते. अनेकदा अशा स्वरूपाचे अपघात यापूर्वी झाले आहेत. या सर्व बाबींची दखल घेऊन सदरची भाजीपाला विक्री व्यवस्थाही ग्रामपंचायत ने ठरवून दिलेल्या पूर्व नियोजित जागेवर होणे आवश्यक आहे. याशिवाय लासलगाव येथे भाजीपाला विक्रीसाठी आणणाऱ्या शेतकऱ्यांकडून ग्रामपंचायत ठेकेदारांकडून बेकायदेशीररित्या जास्तीचे पैसे पट्टीच्या रूपाने घेतले जातात. याशिवाय शेतकऱ्यांना शिवीगाळ, दमदाटी तसेच अर्वाच्च भाषेत धमकावले जाते असे म्हटले आहे. या सर्व प्रश्नावर अधिका-यांनी सकारत्मकता दर्शवत प्रश्न सोडवण्याचे आश्वासन दिले.

हे निवेदन देतांना सचिन आत्माराम होळकर, प्रकाश पाटील, प्रवीण कदम, बबनराव शिंदे, धर्मेश जाधव, प्रमोद, पाटील संदीप उगले, महेश मोरे, महेश बकरे, मयूर झांबरे, अमोल कुमावत, सुरेश कुमावत, सुहास कोल्हे, विकास कोल्हे, राजेंद्र कराड, महेंद्र हांडगे, विजय कचरे, अनिल आबड, सलीम सय्यद आदी उपस्थित होते. सदर निवेदनाची प्रत ही पालकमंत्री छगन भुजबळ, खासदार डॉ भारती पवार, जिल्हा परिषद अध्यक्ष, पंचायत समिती सभापती यांना पाठवण्यात आली आहे.

लासलगांव शहरातील नागरी समस्या सोडवण्यासाठी आम्ही सर्व पक्षभेद आणि राजकीय वैर  बाजूला ठेवून फक्त शहराच्या विकासासाठी एकत्र आलो आहोत. यापुढे लासलगावातील मुलभूत नागरी समस्या संबंधितांनी न सोडल्यास अत्यंत उग्र स्वरूपाचे आंदोलन करण्यात येईल येईल असा इशारा समितीच्यावतीने  सचिन आत्माराम होळकर यांनी दिला.