पुणे (इंडिया दर्पण वृत्तसेवा) – अन्नाची डिलिव्हरी करण्यास आलेल्या झोमॅटो कंपनीच्या डिलिव्हरी बॉयने तरुणीचा विनयभंग केल्याचा धक्कादायक प्रकार पुण्यात घडला आहे. नजिकच्या काळात ऑनलाईन फूड मागविण्याचा ट्रेंड वाढला आहे. त्यातच आता तरुणीचा विनयभंग झाल्याने एकच खळबळ उडाली आहे. याप्रकरणी तरुणीच्या तक्रारीनंतर डिलिव्हरी बॉयला अटक करण्यात आली आहे.
तरुणी घरात एकटीच असल्याचा फायदा घेत, डिलिव्हरी बॉयनं तिचं जबरदस्तीनं चुंबन घेत विनयभंग केला. या तरुणीनं तात्काळ पोलीस स्टेशनमध्ये धाव घेत तक्रार दाखल केली. पोलिसांनी डिलिव्हरी बॉयवर गुन्हा दाखल करत कारवाई केली आहे. त्याला अटकदेखील करण्यात आली आहे. रईस शेख (वय ४०) असे अटक करण्यात आलेल्या झोमॅटो डिलिव्हरी बॉयचे नाव आहे.
मिळालेल्या माहितीनुसार, तरुणी एका नामांकित कंपनीमध्ये कामाला आहे. कामावरुन घरी परतल्यानंतर तिने झोमॅटोवर जेवण ऑर्डर केले होते. जेवणाची डिलिव्हरी करण्यासाठी आलेल्या डिलिव्हरी बॉयनं जबरदस्तीनं त्या तरुणीचं चुंबन घेतलं. येवलेवाडी परिसरातील एका नामांकित सोसायटीत शनिवारी रात्री हा प्रकार घडला. कोंढवा पोलीस ठाण्यात याप्रकरणी गुन्हा दाखल करण्यात आला असून आरोपीला अटक करण्यात आली आहे.
पाणी मागण्याचा बहाणा
शनिवारी रात्री तरुणीने झोमॅटो ॲप वरून जेवण मागवले होते. जेवणाचं पार्सल घेऊन आरोपी रईस शेख रात्री साडे नऊच्या सुमारास तिच्या सोसायटीत आला होता. जेवणाचे पार्सल दिल्यानंतर त्याने तरुणीकडे पिण्याचे पाणी मागितले. पाणी पिल्यानंतर थँक्यू म्हणण्याचा बहाणा करून त्याने तरुणीचा हात हातात घेतला. तरुणीने हात सोडवण्याचा प्रयत्न केला. पण आरोपीने हात घट्ट पकडून तरुणीला जवळ ओढले आणि तिच्या गालाचे दोन वेळा चुंबन घेतले. या सर्व प्रकारानंतर तरुणीने पोलीस स्टेशन गाठून तक्रार दिली. पोलिसांनी याप्रकरणी गुन्हा दाखल करत तात्काळ कारवाई केली. पोलिसांनी आरोपीला अटक तात्काळ केली आहे. पोलीस पुढील तपास करत आहेत.
Zomato Delivery Boy Kiss Young Girl in Pune
Crime Arrest Police Kondhwa Police
