वाशिम (इंडिया दर्पण वृत्तसेवा)- उत्तर प्रदेशचे मुख्यमंत्री योगी आदित्यनाथ यांनी महाविकास आघाडीवर घणाघाती टीका केली आहे. ‘ही महाआघाडी नव्हे, तर महाअनाडी आहे,’ असे सांगून त्यांनी उद्धव ठाकरे यांच्या टीकेला प्रत्युत्तर दिले आहे.
ते म्हणाले, की मोदींच्या नेतृत्वात भाजप शिवसेना आणि राष्ट्रवादी काँग्रेसची महायुती लढत आहे, तर दुसरीकडे महाविकास आघाडीच्या रूपाने ‘महाअनाडी’ निवडणूक लढवत आहेत. त्यांना देश आणि धर्माची चिंता नाही. राष्ट्रीयत्वाची चिंता नाही. समाजामध्ये मूल्य आदर्शाच्या मर्यादेची चिंता नाही, असे हे महाअनाडी गठबंधन आहे. शिवाजी महाराजांचा संघर्ष असो की संभाजी महाराजांचा संघर्ष आपल्याला नवी प्रेरणा देतो. शिवाजी महाराजांनी आपल्या सगळ्यांना एकत्र आणले होते. प्रत्येक भारतवासीयाला आपल्या सेनेचा हिस्सा बनवले होते. छत्रपती शिवाजी महाराजांनी एकतेचे प्रदर्शन करून हिंदवी स्वराज्याची स्थापना केली होती. त्यावरूनच प्रेरणा घेऊन मी वारंवार सांगतो. ‘बटिये मत. क्युकी जब भी बटे थे तब कटे थे, एक है तो नेक है, एक है तो सेफ है, हमे बटना नही है, एकजुट होना है!
योगी आदित्यनाथ यांनी औरंगाबादचे नामकरण संभाजीनगरच व्हायला पाहिजे, हे सांगत असताना अफजल खान आणि औरंगजेब यांच्यात गफलत केली. ते म्हणाले, ‘छत्रपती शिवाजी महाराजांनी ज्या अफजलखानाला मारले, त्याच्या नावावरून औरंगाबाद नाव असणे हे हटवायलाच पाहिजे. संभाजीनगरच्या रूपाने त्याला ओळख मिळाली पाहिजे. शिवाजी महाराजांचा संघर्ष असो की संभाजी महाराजांचा; आम्हाला प्रेरणा आणि आदर्श देतो.
योगी आदित्यनाथ यांनी विधानसभा निवडणुकीच्या प्रचारसभेचा नारळ वाशिममधून फोडला; मात्र या सभेला अल्प प्रतिसाद मिळाल्याचे चित्र पाहायला मिळाले. कारंजा विधानसभा मतदारसंघाच्या भाजपच्या उमेदवार सई डहाके आणि रिसोड विधानसभा मतदारसंघाच्या शिवसेना (शिंदे) पक्षाच्या उमेदवार भावना गवळी या सभेला अनुपस्थित होत्या. त्यामुळे या तिघांना आमंत्रणच नव्हते का, अशा चर्चांना उधाण आले आहे.
