येवला – गुरुवारी पहाटे येवला शहरातील दोन दुकाने फोडून अज्ञात चोरट्यांनी दुकानातील रोख रकमेसह नवीन मोबाईल,चार्जर आणि इतर सामान लंपास केले आहे. पण, ही चोरी सीसीटीव्ही कॅमेरात कैद झाली आहे.
येवला शहरातील शनी पटांगण नजीक असलेल्या इंद्रनील कॉर्नर येथील श्रीकृष्ण मेडिकल या दुकानाचे लोखंडी शटर वाकवुन अज्ञात चोरट्यांनी दुकानात प्रवेश केला. श्रीकृष्ण मेडिकलचे मालक राकेश भांबारे यांनी व्यापाऱ्याला देण्यासाठी दुकानातील गल्ल्यात ठेवलेली १७ हजार रुपयांची रक्कम या चोरीच्या घटनेत अज्ञात चोरट्यांनी चोरून नेली. चोरीच्या दुसऱ्या घटनेत शहरातील बस स्थानकाजवळ असलेल्या पप्पु शेख यांच्या नोव्हेल्टी मोबाईल शॉपी या दुकानाचे शटर वाकवून अज्ञात चोरट्यांनी दुकानातील १ नवीन मोबाईल,ब्ल्यू टूथ,पॉवर बँक यासह ३ हजार रुपयांची रोख रक्कम असा एकूण १५ हजार रुपयांचा ऐवज लंपास केला. दरम्यान, अज्ञात चोरटे चोरी करताना दुकानातील सीसीटीव्हीत कैद झाले आहेत. एकाच रात्रीत दोन दुकाने फोडल्याने व्यापारी वर्गात भीतीचे वातावरण आहे. येवला शहर पोलीस स्टेशनमध्ये याप्रकरणी चोरीचा गुन्हा दाखल झाला आहे.
