येवला (इंडिया दर्पण वृत्तसेवा) – येवला-कोपरगाव रोडवर तहसील कार्यालयाजवळ ट्रकच्या धडकेमध्ये होमगार्डचा मृत्यू झाल्याची घटना घडली. प्रवीण कृष्णा भावसार असे मृत झालेल्या होमगार्डचे नाव आहे. ट्रकने धडक दिल्याने होमगार्ड हे गंभीर जखमी झाले. त्यांना त्वरित नाशिक येथे रुग्णालयात नेत असताना त्यांचा रस्त्यातच मृत्यू झाला.
या अपघाताबाबत येवला शहर पोलीस अधिक तपास करीत आहेत. होमगार्ड प्रवीण कृष्णा भावसार यांचा अपघातात मृत्यू झाल्याने शहर परिसरामध्ये हळहळ व्यक्त होत आहे. येवला – कोपरगाव रोडवर सतत रहदारी असते. या ठिकाणी होणारे अपघात टाळण्यासाठी उपाययोजना करण्याची मागणी आता केली जात आहे. शहरातून जाणारा हा रस्ता असल्यामुळे वाहनांची गर्दी येथे असते. ब-याच वेळा वाहतूक कोंडीच्या समस्येलाही वाहनधारकांना तोंड द्यावे लागले.
