कोलकाता – बंगाल आणि ओडिसाच्या किनाऱ्यावर यास चक्रीवादळाचा जोरदार तडाखा बसला असून जोरदार वारे आणि पावसामुळे किनारी भागातील शेकडो गावे पाण्यात गेली आहेत. लाखो घरे उद्ध्वस्त झाली आहेत. बंगालमध्ये तीन तर ओडिसामध्ये एका व्यक्तीचा मृत्यू झाला आहे. बंगामधील जवळपास एक कोटी लोक प्रभावित झाली आहेत.
पावसामुळे नद्यांमधील पाण्याची पातळी वाढली असून अनेक गावे पाण्याखाली गेली आहेत. चक्रीवादळामुळे प्रभावित झालेल्या पाच राज्यांमध्ये एनआरएफच्या ११३ पथकातील जवानांनी लोकांना सुरक्षित स्थळी हलविले आहे.
ओडिसामधील ५.८ लाख लोक तर बंगालमधील १५ लाख लोकांना आश्रय शिबिरांवर पोहोचविण्यात आले आहे. ओडिसामधील चांदीपूर आणि बालासोर तर बंगालमधील दक्षिण परगना जिल्हा सर्वाधिक प्रभावित झाला आहे. चक्रीवादळामुळे १४५ किलोमीटर प्रतितासाच्या वेगाने वादळी वारे वाहात होते. त्यामुळे अनेक घरांचे नुकसान झाले, तसेच शेतांमध्ये पाणी शिरले आहे.
तौक्ते चक्रीवादळाने पश्चिम भागात थैमान घातल्यानंतर एका आठवड्याच्या आतच यास चक्रीवादळाने पूर्व भागात धुमाकूळ घातला. ओडिसाच्या बालासोर आणि भद्रक जिल्ह्यांमधील १२८ गावे पाण्याखाली गेली आहेत. मुख्यमंत्री नवीन पटनायक यांनी प्रभावित गावांमध्ये पुढील सात दिवस अन्नधान्य आणि आवश्यक वस्तू पोहोचविण्याची घोषणा केली आहे.
ओडिसाचे आपत्ती निवारण आयुक्त पी. के. जेना म्हणाले, बालासोर जिल्ह्यातील बहनागा आणि रेमुना ब्लॉक तसेच भद्रक जिल्ह्यातील धामरा आणि बासुदेवपूरच्या अनेक गावांमध्ये समुद्राचे पाणी शिरले आहे. स्थानिकांच्या मदतीने गावांमधून पाणी काढण्यासाठी पावले उचलली जात आहे.
मयूरभंज जिल्ह्यातील सिमलिपाल राष्ट्रीय उद्यानात मुसळधार पावसामुळे बुधबलंग नदीला पूर आला आहे. दुपारी पाण्याची पातळी २७ मीटरच्या धोकादायक पातळीच्या तुलनेत २१ मीटरवर होती. बालासोरच्या शेजारील मिदनापूर जिल्ह्यातील दिघा हे गाव पूर्णपणे पाण्याखाली गेले आहे. मदत आणि बचाव कार्यासाठी लष्कराला पाचारण करण्यात आले आहे.
ओडिसाची राजधानी भुवनेश्वर आणि बंगालची राजधानी कोलकातामध्ये चक्रीवादळाचा जास्त परिणाम दिसून आला नाही. तेथे जोरदार वारे वाहून मुसळधार पाऊस पडला. चक्रीवादळामुळे पश्चिम बंगालमध्ये एक कोटी लोक प्रभावित झाले असून, तीन लाख घरांचे नुकसान झाले आहे, असे पश्चिम बंगालच्या मुख्यमंत्री ममता बॅनर्जी यांनी सांगितले.
वादळामुळे बंगाल सर्वाधिक प्रभावित झाल्याचा दावा त्यांनी केला आहे. एका व्यक्तीचा दुर्घटनेत मृत्यू झाला आहे. प्रभावित झालेल्या भागामध्ये १० कोटी रुपयांची मदत पोहोचविण्यात आली आहे. जवळपास संपूर्ण बंगालमध्ये पाणी शिरले आहे, अनेक बांध तुटले असून भिंतीही खचल्या आहेत. किनार्यावरील पूर्व मिदनापूर जिल्ह्यातील मंदारमणी, दिघा आणि शंकरपूरसारख्या गावांमध्ये समुद्राचे पाणी शिरले आहे. सखल भागात मोठ्या प्रमाणात नुकसान झाले आहे, असे ममता बॅनर्जी यांनी सांगितले.
