टोकियो – ऑलिम्पिकमध्ये कुस्तीपटू बजरंग पुनियाचा उपांत्य सामन्यात पराभव झाला आहे. बजरंगचा सामना अझरबैजानच्या हाजी अलीव याच्याशी झाला. त्यात १२-५ अशा फरकाने बजरंगला पराभवाचा सामना करावा लागला. उपांत्य सामन्यात पराभव झाला असला तरी शनिवारी (७ ऑगस्टला) कांस्य पदकासाठी होणार्या सामन्यात बजरंगकडून पदकाची आशा आहे.
शुक्रवारी दिवसभर झालेल्या तिन्ही सामन्यात बजरंगने दर्जेदार खेळ केला. सकाळी त्याने ६५ किलो वजनीगटात बजरंगने किर्गिस्तानच्या अरनाजर अकमातालिव्हचा पराभव करत उपांत्यपूर्व फेरीत प्रवेश केला. त्यानंतर उपांत्यपूर्व सामन्यात इराणाच्या मोर्तेजा घियासी याच्यासोबत बजरंगची लढत झाली.
या सामन्यात शेवटच्या काही क्षणात बजरंगने घियासीला लोळवून सामना जिंकला. या विजयाने पुनियाने उपांत्यफेरीत प्रवेश केला होता. उपांत्य सामन्यात मात्र बजरंगला अझरबैजानचा कुस्तीपटू हाजी अलीव याने १२-५ असा फरकाने पराभूत केले. भारताचा कुस्तीपटू रविकुमार दहियाने रौप्यपदकावर नाव कोरल्यानंतर सर्वांच्या नजरा बजरंग पुनिया आणि सीमा बिस्लाकडे लागल्या होत्या. मात्र सीमा बिस्लाचा पराभव झाला. परंतु बजरंगने उत्कृष्ट कामगिरी करत पदकाच्या आशा जिवंत ठेवल्या आहेत.
